Matebian Chico Gama. Imajen/Dokumentu Familia

DILI, (TATOLI)—Timor-Leste lakon tan ona artista seniór no lendáriu ida ne’ebé ohin hakotu nia peregrinasaun iha mundu iha Ospitál Privadu Fatumeta, Dili.

Francisco Gama, ne’ebé famozu ho naran Chico Gama nu’udar kompozitór no artista, husik hela família, parentis, amigu no maun-alin sira hotu, iha tuku 13.00 Otl, tanba sofre moras komplikasaun.

Daudaun ne’e, matebian ne’ebé koñesidu ho nia kananuk ho títulu “Keta Fahe”  nia mate isin haloot hela iha  matebian nia uma Taibessi, Dili, hodi hein loron funerál nian.

Iha tinan 1985, Chico Gama ho nia amigu Tony Pereira, Anito Matos, Piki Pereira, Elias Freitas, José Cameirão no Dinos Quito,  harii banda múzika “Arquiris Band” ne’ebé famozu tebes iha tempu ne’ebá. Ema hotu iha territóriu Timor ‘hawelok”  Chico Gama ho “Arquiris Band” tanba sira ni’a múzika mesak furak.

Iha Banda Múzika Arquires ne’e, Chico Gama ho nia maluk sira konsege prodúz album ba dahuluk iha altura ne’ebá (1985) ho títulu “Batar Tema”.

Matebian mós hanesan futebolista koñesidu ida iha Timor no sai melor jogadór hodi reprezenta governu provínsia ba joga fat-fatin iha territóriu Indonézia no mós Austrália iha tempu ne’ebá.

Iha karreira ikus iha futeból, Chico Gama inklui iha selesaun nasionál hodi reprezenta Bank Suma ba joga iha Austrália iha tinan 1994 no deside hela metin iha Austrália tanba situasaun polítika iha Timor momentu ne’ebá la kondusivu.

Abito Gama nu’udar oan mane  fó sasin ba Ajénsia TATOLI iha sira nia horik fatin, Taibessi katak, ninia aman moras krónika, maibé moras saida loos sira lahatene tanba doutór/a la fó sai matebian nia moras.

Hanesan oan, Abito Gama triste tanba lakon aman doben ne’ebé durante ne’e hamahon sira ho domin boot, no hanesan artista nia sente lakon artista seniór di’ak ida ne’ebé inspira artista junior sira iha mundu múzika Timor-Leste nian.

Chico Gama hala’o tratamentu iha klínika refere kuaze semana ida hafoin kura ho ai-moruk tradisionál iha Lospalos la pasa. Antes ne’e, matebian hela iha Australía durante tinan 25 no foin fila hikas mai Timor iha Marsu, fulan kotuk.

Matebian hakotu iis ho idade 60-itál. Nia husik hela oan na’in 13, ne’ebé nia oan na’in rua; Abito Gama ho Juga Gama, hakat tuir nia aman nia ain fatin nudár mós kompozitór no artista.

Jornalista: Xisto Freitas

Editór: Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here