Logo AEMTL

DILI, (TATOLI) – Asosiasaun Emprezariál Feto Timor-Leste (AEMTL, sigla portugés) habelar espíritu empreendedorizmu ba labarik no joven vulneravel hamutuk 25 iha Fundasaun Forum Komunikasaun Oratóriu Don Bosku.

Cármen Araújo, Vise-Prezidente ba Empoderamentu no Relasaun Esterna AEMTL hatete tinan ne’e AEMTL hanoin atu serbisu hamutuk ho labarik vulneravel sira hodi fó esperansa atu bele komprende momentu ne’e temporáriu para kontinua mehi aas, mezmu sira-nia moris ohin la’o iha difisil.

“Ida ne’e labele afeta sira-nia vida tomak, sira tenke kontinua duni tuir mehi ba buat ne’ebé sira hakarak”, Cármen afirma liuhusi semináriu loron rua (23-24) ho tópiku “Ha’u Serbisu Iha Ha’u-Nia Mehi” ne’ebé hala’o iha Balidi, ohin.

“Ami kuda de’it fini oan ida para fó esperansa ba sira katak ida ne’e la’ós imi-nia vida, ne’e hanesan tempu ida imi foin liu no imi tenke duni tuir buat ne’ebé imi hakarak”.

Iha atividade ne’e, AEMTL fornese matéria sobre oinsá maka hanoin negósiu (business mindset) nu’udar dalan ida para sira duni tuir mehi ne’e. Tanba ne’e maka durante iha atividade ne’e oinsá maka haburas sira-nia mehi no kriatividade tanba sira iha mehi oioin.

“Agora, atu fó sentidu responsabilidade para sira atu la’o bá ne’e oinsá? Entaun, ohin ami estimula sira-nia hanoin ba buat ne’ebé importante ba sira no aban ko’alia uitoan kona-ba oinsá maka halo planu no ANZ mós mai hodi fó oinsá maka money minded katak ita mehi mas komesa ona sukat osan hira, gasta hira, osan hira maka ita bele duni tuir ita-nia mehi ne’e, oinsá maka ninia frutu (income) ne’e ita atu hetan, entaun ho organizasaun sira ne’e nia kolaborasaun, ita bele hetan matéria ne’ebé sai util”.

Iha selebrasaun aniversáriu XI AEMTL nia maka deside hodi halo buat ne’ebé maka relevante ho asosiasaun ne’e nia misaun, la’ós de’it atu halo simpóziu internasionál ne’ebé iha relevánsia ho mementu ne’ebé liu, maibé mós iha misaun habelar empreendedorizmu, prinsipalmente ba labarik no joven sira.

João Ferreira, husi Banku ANZ, aprezenta ba sira kona-ba mindset ka hanoin ema ida-idak nian oinsá maka sira-nia mehi bá oin atu hala’o negósiu ne’ebé sira hanoin tiha ona iha sira-nia mehi.

Bainhira sira hatene ona sira-nia mehi saida maka atu hala’o iha futuru, entaun oinsá maka fó hatene ba sira atu haburas mehi ne’e di’ak liután.

“Ami mai atu hato’o katak oinsá maka komprende didi’ak merkadu ne’e katak fatin ne’ebé maka sira bele hala’o sira-nia negósiu ka lae? Maneira saida maka atrai ema se sasán hanesan hotu maka oinsá maka ema bele hili liu sira-nian”.

Tanba ne’e hanorin mindset ba negósiu báziku atu sira bele haburas sira-nia negósiu ne’e.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here