Nasaun sira membru ba ARF. imajen espesiál

DILI, (TATOLI) – Timor-Leste sei sai uma-na’in ba semináriu Forum Rejionál ba Asosiasaun Nasaun sira iha Sudeste Aziátika (ARF-sigla inglés) kona-ba Diplomasia Preventiva no Alerta Sedu.

Semináriu ne’e ligasaun ba rezolusaun konflitu durante loron tolu, hahú 24 to’o 26 abril 2019, iha Novo Turizmu Resort, Dili.

Tuir nota imprensa hosi Departamentu Komunikasaun Sosiál, Ministériu Negósiu Estranjeiru no Kooperasaun (MNEK) ba TATOLI katak semináriu ne’e sei ko-prezide alende Governu Timor-Leste inklui mós Indonézia, Estadu Naklibur Amérika no Nova Zelándia.

Objetivu husi semináriu loron tolu ne’e mak atu hakle’an no hametin entendimentu no komprensaun kona-ba prinsípiu sira iha diplomasia preventiva ARF nian no atu esplora forma sira ne’ebé bele hametin kapasidade atu prevene eskalasaun konflitu rejionál liuhusi destakamentu mekanizmu alerta sedu no responde sedu.

Partisipa iha workshop importante ne’e mak reprezentante sira husi país membru ARF, espesífikamente ministériu sira ne’ebé envolve iha manutensaun pás, seguransa, alerta sedu no polítika sósiu-kulturál nian, reprezentante husi Konsellu Vogál no asesória institutu ASEAN ba dame no rekonsiliasaun no mós membru grupu pesoál eminente no espesialista ARF nian.

Instituisaun no organizasaun lokál no rejionál sira envolve iha alerta sedu, pás no seguransa no sira ne’ebé servisu ho feto, joven sira no populasaun minoria sei partisipa mós no lori sira-nia esperiénsia ida-idak atu fahe iha semináriu ne’e.

ONG Belun, nu’udar ONG lokál iha Timor-Leste sei iha oportunidade atu fahe mós sira-nia esperiénsia ba partisipante sira.

Tuir nota MNEK, semináriu ne’e sei hahú ho nia formalidade sira iha abertura ofisiál ne’ebé sei hala’o iha kuarta- feira (24/4) tuku 9.00 dadeer.

Ministériu Negósiu Estranjeiru no Kooperasaun, Dionísio Babo Soares, sei hato’o ninia diskursu abertura no sei tuir kedas ho diskursu prinsipál husi José Ramos Horta, Antigu Prezidente no Laureadu Prémiu Nobel ba Pás.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here