Sekretáriu Estadu Kooperativa, Arsénio Pereira da Silva. Imajen/Egas Cristovão

DILI, (TATOLI)–Sekretáriu Estadu Kooperativa (SECoop-sigla portugés), Arsenio Pereira da Silva, otimista katak, setór Kooperativa liuliu Kooperativa Produsaun Agríkola, preparadu  fornese ai-han ba kosta súl bainhira dada kadoras mai Beaco ho sustentabilidade.

“Polítika Oitavu Governu Konstitusionál liu Sekretáriu Estadu Kooperativa nian mak foka liu kooperativa produsaun agríkola, ho ida mak setór kooperativa preparadu atu fornese ai-han ba traballadór sira ne’ebé mak sei serbisu iha kosta súl bainhira dada kadoras mai Beaco, Munisípiu Viqueque, ho sustentabilidade”, hateten SECoop, Arsenio Pereira da Silva,  hafoin kuda Ai-akásia nia oan iha Jardim Motael, Dili,  Segunda (22/04/2019).

Komunikadu imprensa ne’ebé Gabinete Media SECooP haruka  mai Ajénsia TATOLI  relata katak, ba oin SECoop sei halo kooperasaun ho Ministériu Agrikultura no Peska (MAP) hodi nune’e parte MAP bele fó asisténsia téknika ba Produtores iha área remota oinsa sira bele prodús ho ai-han ho nutrisaun di’ak no mós produsaun balun bele ba ona indústria.

Total orsamentu jerál estadu tinan ida ne’e aloka ba SECoop ho montante millaun US$3.7 ho  kategoria haat  mak hanesan, saláriu no vensimentu, Kapitál Minor, Bens Serbisu, no transferénsia públiku. Iha transferénsia públiku ho montante millaun US$1.4 sei transfer ba kooperativa hodi dezenvolve kooperativa, liu-liu kooperativa produsaun.

Durante ne’e kooperativa hamutuk 193 mak rejistu iha Diresaun Nasional Kooperativa Governu anterior nian. Maibé, kooperativa hamutuk  30 resin hetan sertifikadu, no kooperativa hirak ne’e iha ramu oin-oin hanesan kooperativa kréditu union, federasaun, no kooperativa produsaun no seluk-seluk tan.

EKIPA

HAKEREK NO HATÁN

Please enter your comment!
Please enter your name here