Ofisiál forsa FALINTIL-FDTL husi Unidade Naval forma hodi simu Forsa Naval hosi Estadu Naklibur Amérika ne’ebé mai ho Ró USNS FALL RIVER iha Ponte kais Dili, hodi fó asisténsia saúde ba komunidade. Segunda, 22 abril 2019. Imajen António Gonçalves

DILI, (TATOLI) – Ró Forsa naval (fall River) hosi komandu transporte marítima militár hosi Estadu Naklibur Amérika, ohin to’o iha Dili hodi fó asisténsia saúde ba komunidade liuhosi parseria Pasífika 2019 iha Timor-Leste.

Vizita ohin ne’e ba da-hitu ona liuhosi programa Pacific Partnership hafoin nasaun  sira iha Pasífiku estabelese, 2006.

Misaun ne’e envolve ona durante tinan barak husi konsentra ba kuidadu saúde direta ba fali operasaun ida ne’ebé foka liubá hametin parseria liuhusi interkámbiu asuntu espesializadu no asuntu sivíl-militár ho nasaun uma-na’in.

“Pacific Partnership maka misaun kooperasaun nian ne’ebé fortaleza kapasidade nasionál no preparasaun hodi responde ba emerjénsia sira dezastre nian”, haktuir Kapitaun Navál EUA, Randy Van Rossum, nu’udar Komandante Pacific Partnership 2019 liuhosi komunikadu   ne’ebé TATOLI asesu hosi mídia officer embaixada Amérika iha Dili, ohin.

Misaun iha Timor-Leste maka atu troka koñesimentu inklui projetu enjeñaria asaun sívika, ezersísiu ajuda umanitária-asisténsia ba dezastre, prontidaun médiku no saúde nehan, konsertu banda muzikál no kontaktu ho komunidade.

“Ami serbisu hamutuk, fahe koñesimentu, no implementa lisaun sira ne’ebé aprende ona. Ita prepara hamutuk iha ohin loron permite resposta efetivu iha futuru.”

Embaixadora Amérika ba Timor-Leste, Kathleen M. Fitzpatrick. Imajen António Gonçalves

Embaixadora Amérika ba Timor-Leste, Kathleen M. Fitzpatrick, haktuir orgullu ba prezensa ró marina ho ninia profisionál militár hodi ajuda povu TL.

“Governu Estadus Unidus sente orgullu aprezenta Ró Forsa Navál Estadus Unidus Amérika nian Fall River no, profisionál militár no sivíl sira ne’ebé partisipa iha Pacific Partnership 2019”.

Reprezentante ne’e dehan relasaun militár entre nasaun rua forte liután liuhosi treinamentu, vizita, ezersísiu anuál, interkámbiu, projetu infraestrutura, tanba forsa Navál SEABEES kolabora hamutuk ho enjeñeiru sira husi FALINTIL-Forsa Defeza Timor-Leste.

Servisu ne’e bazeia ba konvite husi nasaun uma-na’in ida-idak, Pacific Partnership reúne hamutuk membru parseiru militár no sivíl sira husi Austrália, Kanadá, Japaun, Malázia, Peru, Filipina, Koreia Súl, Tailándia, Reinu Unidu no Amérika.

Pacific Partnership, agora ne’e iha ninia misaun ba tinan 14, nu’udar misaun anuál boot liu multilaterál nian ba ajuda umanitária no preparasaun atu fó apoiu iha dezastre hala’o iha Indo-Pasífiku.

Kada tinan, ekipa misaun serbisu hamutuk ho nasaun uma-na’in sira no parseiru sira atu mellora interoperabilidade (kapasidade sistema) rejionál no kapasidade responde ba dezastre, aumenta estabilidade no seguransa iha rejiaun, no promove amizade foun no ba tempu naruk iha Indo-Pasífiku.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here