Ministru Agrikultura no Peskas Joaquim José Gusmão dos Reis Martins,Imajen/Egas Cristovão

DILI, (TATOLI) – Ministru Agrikultura no Peska, Joaquim José Gusmão dos Reis Martins, hamutuk ho Primeiru-Ministru (PM), Taur Matan Ruak, hahú diskute planu Orsamentu Jerál Estadu (OJE) tinan oin.

“Primeiru-Ministru bolu ha’u hodi bele dada-lia, liu-liu fó hanoin ba malu hodi bele halo planu ne’ebé mak di’ak, tanba ita nia OJE 2020 mós besik ona ohin ha’u mai atu bele halo diskusaun no simu orientasaun”, tenik ba jornalista sira iha Palásiu Governu, segunda (22/4).

Nia hatutan: “Ba oin Ministériu Agrikultura no Peska kontinua tau prioridade ba produsaun ai-han prinsipál hanesan haree no batar, hafoin ita koko atu hasa’e produsaun”.

Tuir governante ne’e iha indikasaun hodi bele hasa’e produsaun, tanba iha ona programa governu nune’e, nia iha esperansa to’o tinan 2023 bele hatún importasaun husi rai li’ur no hasa’e produsaun iha rai laran.

Iha biban diskusaun, Ministru Joaquim hetan orientasaun husi Xefe Governu hodi bele prepara planu ne’ebé di’ak, tanba agrikultura sai hanesan prioridade ba governu, maske nia rasik rekoñese orsamentu ba agrikultura ne’ebé mak aloka ba tinan ne’e ki’ik tebes.

“Atu eleva orsamentu ne’ebé adekuadu, ita tenke iha planu ne’ebé di’ak atu bele hato’o no responsabiliza iha orsamentu ne’ebé ita halo ona nia planu”, akresenta.

Iha Orsamentu 2019 aloka ona ba MAP hamutuk milliaun $14,709, ne’ebé ezekusaun iha trimestre dahuluk atinje ona porsentu 24, ne’ebé ezekuta ba programa jerál sira hanesan viajen lokál, peskiza, sosa fini ne’ebé iha hela prosesu konkursu públiku.

Haktuir iha program Governu, konsidera agrikultura hanesan baze ba dezenvolvimentu ekonómiku no sosiál Nasaun nian, tanba ne’e hadi’a setór ida ne’e, iha ligasaun ho oinsá hadi’a setór peska no produsaun animál, nune’e iha tempu badak nia laran, hadi’a kualidade no moris di’ak ba timoroan tomak.

Nune’e, meta (alvu) Governu nian mak atu hadi’a seguransa ai-han (seguransa alimentár) nasionál, redús pobreza rurál, apoia tranzisaun hosi kultura (agrikultura) subsisténsia nian ba produsaun emprezariál ba produtu agríkola, pekuária no peska nian, hodi promove sustentabilidade ambientál no konservasaun rekursus naturál Timor-Leste nian.

Atu kumpre objetivu ba nivel seguransa ai-han (seguransa alimentár) nian, Governu sei habelar sektór agríkola, hadi’a prátika kultivu no produtividade agrária, dezenvolve asaun sira hodi hadi’a produsaun kultura agríkola espesífika no sistemátika, ho potensiál hosi rejiaun ida-idak hodi garante mós objetivu atu dezenvolve nasaun nia sektór produtivu sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here