Ministru Defeza no Ministru Interiór ein ezersísiu, Filomeno da Paixão de Jesus. Imajen/ \Egas Cristovão

DILI, (TATOLI) – Ministru Interior en ezersísiu, Filomeno Paixão, hateten atu integra forsa rua hanesan Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), sei laiha rekrutamentu ba polísia, maibé sei foti husi forsa ne’ebé iha ona.

“PNTL laiha tan rekrutamentu ba oin, rekruta F-FDTL, rekruta no treinu iha ne’ebá, tanba sira labele hela iha fatin ne’e. Rekruta hotu sai fali PNTL”, dehan nia ba jornalista sira iha Palásiu Governu, segunda (22/4).

Nia hatutan: “Enkuantu ha’u hanesan Ministru Interiór, ha’u dehan rekruta no treinu FDTL, fó instrusaun no edukasaun sidadania, edukasaun sívika hodi bainhira treinu hotu sai husi ne’ebá sira ba fali polísia”.

Governante ne’e dehan tan, nune’e ba oin bele mós prepara ema ne’ebé iha F-FDTL sai fali funsionáriu públiku ou fatin seluk ne’ebé presiza hanesan protesaun sivíl, imigrasaun no seluk tan.

“Kestaun la’ós labele aumenta PNTL maibé F-FDTL tenke iha ema 3.600 tuir lei, ou ezemplu bainhira iha 3.000 de’it 600 ne’e tenke troka bebeik, entaun duke ita la uza entaun tau de’it ba polísia”, katak.

Nu’dar Ministru Defeza, Filomeno Paixão dehan planu rekrutamentu ba F-FDTL komesa tinan oin no nia kuota depende nesesidade, maibé jeralmente ba F-FDTL sei rekruta ema hamutuk 500 ou 600.

“Hanoin hanesan para hotu-hotu sai ho valór di’ak ho edukasaun, hanoin ba integrasaun forsa rua ne’e para ema ne’ebé formadu ona iha  hanoin, ha’u mai iha ne’e la’ós para aranja problema iha F-FDTL, para ba oin evita kotuk mosu ona ne’e tanba ne’e ita tenke halo buat ruma”, akresenta.

“Sei ha’u mak Ministru  Interiór ha’u atu halo ida ne’e para verifika problema ne’ebé mosu entre Polísia no F-FDTL”, katak tan.

Antes ne’e, PNTL iha planu iha tinan 2019 halo rekrutamentu ema nain 520 maibé rekrutamentu ne’e kanseladu no adia ba tinan 2020, tanba tuir Primeiru-Ministru, Taur Matan Ruak, orsamentu ba PNTL ultrapassa husi tetu ne’ebé Ministériu Finansa (MF) fó, maske tuir instituisaun nia hanoin ida ne’e importante tanba atu reforsa efetivu iha terrenu.

Iha orsamentu 2019, PNTL propoen milliaun $39 resin ba atividade operasionál sira hanesan kombustível, alimentasaun, kompra viatura hodi suporta operasionál iha terrenu hanesan patrullamentu, tránzitu no unidade espesiál sira nia serbisu.

Dadaun ne’e, membru PNTL iha ona 3.000 resin ne’ebé destakadu iha eskuadra no postu seguransa sira, inklui ofisiál polísia suku iha territóriu tomak.

PNTL rasik sei menus rekursu umanu hodi reforsa instituisaun polísia liu-liu Ofisiál Polísia Suku (OPS) no Polízia Tránszitu ne’ebé sei menus.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here