LIKISÁ, (TATOLI) – Munisípiu Likisá jeografikamente lokaliza iha parte osidentál Dili nian ho kilómetru 32, poténsia ba turizmu tanba natureza; ai-horis, balada, foho no tasi-ibun sira, klima, patrimóniu ho arkitetura portugeza nian ne’ebé furak hodi atrai turista doméstika no mós estranjeiru sira hodi vizita munisípiu ne’e.

Tasi-ibun Maubara Dair  (Banamo-Lebuana), Fortes de Maubara, Tibalau, Kaitehu,  Eis-komarka Aipelu no mós fatin istóriku sira sai “ikónu” prestíjiadu ba Likisá-oan sira ne’ebé sempre idéntiku ho “Hu Iso Lara Iso” katak neon ida, laran ida, hodi ipnotiza turista sira-nia fuan, dada sira-nia matan hodi bele vizita sira-nia rain ho esperansa bele kontribui reseita doméstika ba komunidade Likisá no Timor-Leste rasik.

Tanba poténsia sira ne’e, autoridade Munisípiu Likisá kompromete dezenvolve, alende área importante seluk hanesan, edukasaun, saúde, agrikultura no mós área seluk tan, sempre tau konsiderasaun másima mós ba área turizmu, hodi bele hetan prosperidade liuhusi reseita sira ba munisípiu ne´ebé lokaliza mós iha zona litorál ne’e.

“Proposta planu investimentu ami aprezenta ona ba governu Sentrál, fatin sira hanesan lagoa, mai tasi ibun sira ne’e, depois fatin sira identifikadu hanesan Tibalau. Ami hato’o ona proposta. Proposta ne’e aprova ona. Orsamentu sira sei prevee iha 2020 nian”, hateten reprezentante administradór munisípiu Likisá, Sekretáriu Renato Moniz Serrão, ba TATOLI iha suku Vatuboro, postu administrativu Maubara, segunda (22/4).

Likisá-oan sira nafatin la tuur nonook hodi “kruza liman, hateke ba lalehan azúl hodi hein milagre” atu dezenvolve sira-nia rai moris fatin, maibé buka tuur hamutuk entre komunidade, lider komunitáriu, veteranu sira no seluk tan hodi halibur hanoin di´ak sira, hodi identifika no elabora planu ba dezenvolvimentu populasaun ho maioria dalen Tokodede ne´e.

“Ne’ebé, aban ne’e ami sei iha enkontru boot ida iha Likisá loron rua atu elabora orsamentu jerál 2020 nian atu responde ba nesesidade ne’ebé munisípiu tau ne’e”, afirma.

Iha Orsamentu Jerál Estadu (OJE) 2019 nian, definidu iha Livru B (Munisípiu) divulga iha pájina 73  tabela 9.2 (Despeza Jerál) katak verba alokadu ba área turizmu iha Likisá ki’ik liu (hamutuk 22 mil inklui mós jestaun merkadoria).

“Kona-ba orsamentu ne’ebé ohin ita temi ne’e orsamentu operasionál, la’ós orsamentu ba infraestrutura atu dezenvolve ba poténsia turizmu sira ne’e”, katak Renato Moniz Serrão.

Nia haklaken poténsia turizmu ita tenke konsidera tanba ita hatene katak governu nia haree ba futuru, área turizmu mak bele ajuda fundu mina-rai para bele sustenta fali governu.

“Ne’ebé, ita-nia planu investimentu ba dezenvolve área poténsia turizmu sira ne’e konsidera orsamentu sei tau iha 2020”, kompromete Sekretáriu Renato Moniz Serrão.

Sekretáriu ne’e mós konfirma ho hanoin ba dezenvolvimentu turizmu nian, autoridade Likisá nian hamutuk konsolda kbiit no esforsu sira, tuir polítika governu nian, iha dispozisaun administrativa iha ekipa rua; ekipa ida mak bolu Konsellu Konsultivu Munisípiu, Konsellu Konsultivu Lokál.

Konsellu Konsultivu Lokál ne’e mak xefe suku sira, veteranu sira, ONG (Organizasaun Naun-Governamentál sira, parseiru dezenvolvimentu sira. Konsellu Koordenasaun munisípiu ne´e mak Governu nia diresaun sira ne´e.

“Ne’ebé, forsa rua ne’e mak halo diskusaun ida, depois define modelu saida mak atu halo para depois fó resposta ba polítika dezenvolvimentu ba setór turizmu nian”.

Iha biban ne’e, Sekretáriu Renato Moniz Serrão ho kompromisu hakarak dezenvolve Likisá ne´ebé ho luan área 543 Km2 ho populasaun na´in 63.403 tuir Sensu 2010 ne’e, rekomenda ba governu sentrál atu bele tau konsiderasaun ba sira-nia proposta ne’ebé mak submetidu ona.

“Governu bele tau konsiderasaun ba ami-nia proposta ne’ebé mak ami hato’o ona para depois orsamentu ne’ebé mak ita tau ne’e bele to’o duni para depois 2020 ba oin ne’e ita bele hahú ona, tanba proposta ita hato’o ne’e to’o ona”, rekomenda Sekretáriu Renato Moniz Serrão ba governu sentrál hodi sira bele dezenvolve Likisá ho postu administrativu tolu, suku 23 no aldeia134 ne’e.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here