DILI, (TATOLI) – Prezidensia Repúblika propoin medalla órden Timor-Leste foun ba Servisu Destintu no Medalla ba Servisu Públiku-Méritu atu kontinua valoriza individu ka organizasaun sira ne’ebé presta ona servisu exepsionál sira ba dezenvolvimentu nasionál.

Atu produs medalla sira ne’e, reprezentante Prezidénsia Repúblika, Francisco Maria de Vasconcelos, halo diskusaun ho kompaña fornesedór medalla, Eng. Leong Medallic Industries (ELM) liuhosi ninia reprezentante Gerard Leong nu’udar Asistente Jerente Jerál, iha Sede 57 Medal House, Yishun Industrial Park A, Singapura, segunda (15/4/2019) foin lalais ne’e.

Tuir informasaun ne’ebé Tatoli asesu hosi mídia PR kuarta ne’e katak ideia ba produsaun prémiu foun ne’e, tanba kritéria sira labele hetan Prémiu Órden Timor-Leste.

“Prémiu Órden Timor-Leste maka prémiu ida ho klase ka kategoria aas liu iha Timor-Leste, tanba ne’e ita tenke matein nia prestíjiu no klase hodi garante kondekoradu ne’e ba ema ne’ebé merese duni no ba sira ne’ebé la hetan Órden Timor-Leste bele hetan prémiu ho klase seluk”, Xefe Kaza Sivíl esplika iha nota informasaun.

Medalla ba servisu distintu sei entrega husi Prezidente Repúblika ba sidadaun nasionál ka internasionál ne’ebé presta servisu no dedikasaun exelente ba Prezidénsia Repúblika. Medalla ne’e mós bele fó ba organizasaun nasionál ka internasionál ne’ebé kontribui maka’as ba Timor-Leste.

Medalla ba Servisu Públiku-Méritu sei entrega ba funsionáriu públiku sira ho kontratu permanente ba sira nia dedikasaun aas ba Timor-Leste. Medalla ne’e sei fó deit ba servente públiku sira ne’ebé nunka hetan sansaun disiplinária no kriminál no mós nunka hetan valór menus ka insatisfatóriu iha avaliasaun dezempeñu.

Prémiu Órden Timor-Leste maka kondekorasaun prinsipál iha órden onorífiku Timor-Leste nian, inísia hosi eis Prezidente Repúblika, José Ramos Horta, liu husi dekretu lei númeru 20/2009, 24 abril 2009 hodi fó rekoñesimentu ba kontribuisaun signifikativa hosi sidadaun ba Nasaun no mós ba umanidade.

Prémiu Orden Timor-Leste iha grau haat maka; Grande Colar, Colar, Medalla no Insígnia. Grau Grande Colar sei fó de’it ba Xefe Estadu sira.

Iha sorumutu ne’e, Xefe Kaza Sivíl asina mós kontratu públiku ba fornesemintu bens ho kompaña Eng Leong Medallic (ELM) hodi fornese Medalla órden Timor-Leste ho Grau Colar 14 no Grau Medalla 30 ezemplár.

Medalla sira ne’e sei entrega hosi Prezidente Repúblika ba kondekoradu sira iha loron nasionál sira hanesan 20 maiu, 30 agustu, 28 novembru no loron nasionál sira seluk.

Hahú kriasaun Órden Timor-Leste iha 2009, Prezidénsia Repúblika serbisu hamutuk ona ho kompaña ELM hodi fornese medalla ba Prezidénsia Repúblika.

Kompaña ELM koñesida ida iha Singapura, estabelisida iha 1968 no fornese servisu ba Nasaun liu 30 inklui Timor-Leste.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here