Ministru Reforma Lejizlativa no asuntu Parlamentár, Fidelis Manuel Leite Magalhães. Imajen Egas Cristóvão

DILI, (TATOLI)-Reuniaun Konsellu Ministru (KM), Kuarta (17/4/2019), rona aprezentasaun husi Sekretariadu Grupu Traballu Objetivu Dezenvolvimentu Sustentavel (ODS) ba Revizaun Nasionál Voluntária.

“Konsellu Ministru rona aprezentasaun ida ne’ebé husi Gabinete Primeiru-Ministru no Ministériu Reforma Lejizlativa no Asuntu Parlamentár (MRLAP) maka propoin no aprezentasaun ne’e hato’o informasaun ba membru Konsellu Ministru kona-ba prosesu ida hanaran Revizaun Nasionál Voluntária ba Objetivu Dezenvolvimentu Sustentavel”, informa Ministru Reforma Lejizlativa no Asuntu Parlamentár, Fidelis Manuel Leite Magalhães, ba jornalista hafoin soru-mutu KM iha Palásiu Governu.

Durante iha aprezentasaun ne’e Sekretariadu Grupu Traballu submete ona konsiderasaun membru Governu sira kona-ba testu ho mensajen xave hamutuk 11, ne’ebé maka aliña ho programa Governu Da-ualu ne’ebé maka konstitui eixu prinsipál komunikasaun ne’ebé fó dalan atu tranzmite kona-ba progresu implementasaun hosi ODS.

Membru governu sira mós aprezenta rekomendasaun ba alterasaun testu finál husi mensajen xave sei remete ba sede Organizasaun husi Nasaun Unida to’o loron 17 Abríl 2019.

KM aprova tiha ona iha soru-mutu loron 13 Fevereiru tinan ne’e, rekomendasaun prinsipál sira ba Revizaun Nasionál Voluntária no durante Fevereiru no Marsu realiza tiha ona konsulta ba organizasaun Sosiedade Sivíl.

Relatóriu finál no mensajen xave sei aprezenta iha Forum Polítiku Altu Nivel Nasaun Unida ne’ebé maka monu iha loron 9-18 Jullu, tinan ne’e, iha Nova Iorke.

Tuir pájina ofisiál SGD Timor-Leste katak, rezultadu husi aprezentasaun ne’e hetan ona apresiasaun husi KM no mensajen xave sei haruka bá Nova Iorke iha loron 17 Maiu.

Notísia relevante : http://www.tatoli.tl/2019/01/tl-sei-aprezenta-relatoriu-ods-ba-nova-iorke-iha-tinan-nee/

http://www.tatoli.tl/2019/02/grupu-traballu-ods-buka-konsensu-molok-aprezenta-ba-nova-iorke/

Jornalista: Maria Auxiliadora

Editór: Francisco Simões

 

HAKEREK NO HATÁN

Please enter your comment!
Please enter your name here