DILI, (TATOLI) – Governu liuhosi reuniaun Konsellu Ministru (KM) ne’ebé lidera hosi Primeiru Ministru, Taur Matan Ruak, ohin analiza proposta ba nota entendimentu ne’ebé sei estabelese kooperasaun entre Timor-Leste ho governu Tazmánia-Austrália.
Proposta kooperasaun ne’e aprezenta hosi ministru en ezersísiu ba asuntu kombatente libertasaun nasionál, Gil da Costa Monteiro Oan Soru, kona-ba programa formasaun no dezenvolvimentu profisionál ba jestaun no prezervasaun ba parke nasionál sira iha nasaun.
“Ohin aprezenta MoU ida maibé konsellu tuir mai maka halo desizaun kona-ba ida ne’e hafoin hetan paresér hosi ministériu kompetente hanesan ministériu finansa, ministériu negósiu estranjeiru no kooperasaun no mós ministériu agrikultura no peska”, dehan Ministru Reforma Lejizlativa no Asuntu Parlamentár, Fidelis Manuel Leite Magalhães, ba jornalista sira iha Palásiu Governu, ohin.
Governu konsidera kooperasaun ne’e importante tanba atu konserva patrimóniu naturál no kultura nasionál hodi kontribui, hasa’e kualidade vida komunidade no mós promosaun dezenvolvimentu turizmu istóriku no sustentavel.
Timor Leste iha Parke Nasionál Nino Konis Santana iha Lautein, Parke Kay Rala Xanana Gusmão iha Manufahi no Ainaru.
Proposta nota kooperasaun ne’e sei diskute fali hodi hetan aprovasaun finál iha reuniaun konsellu ministru depois ferias semana santa (Paskua).
Jornalista: Agapito dos Santos
Editora: Rita Almeida
