SEFOPE, Konnekto ho ISAT asina nota entendimentu. Foto/Mídia SEFOPE

DILI,(TATOLI)-Sekretáriu Estadu Formasaun Profisionál no Empregu (SEFOPE) nia parseiru estratéjiku na’in tolu, kompostu husi Konnekto, Industry Safety Assessment and Training (ISAT) ho Sols, prontu tulun no prepara timoroan ne’ebé mak atu ba servisu iha rai li’ur.

Parseiru SEFOPE nian hirak ne’e hatudu sira nia prontidaun liu husi asina nota entendimentu ne’ebé entre parte sira hala’o iha SEFOPE, Dili, Tersa (16/4/2019).

Konnekto ho ISAT sei halao responsabilidade kona-ba oinsá atu liga traballadór timoroan ne’ebé maka hakarak buka oportunidade serbisu iha rai-li’ur no mós ho Sols atu prepara timoroan iha formasaun língua nian.

Diretór Jerál SEFOPE, Paulo Alves, hatete Konnekto ho ISAT ajénsia ne’ebé eziste kleur iha Timor-Leste no halo servisu tinan barak ona, ajuda timoroan  no  prepara timoroan sira sai bá li’ur.

“ISAT ne’e instituisaun ne’ebé SEFOPE halo ona kooperasaun ho sira en termu treinamentu no Konnekto ajénsia ida ne’ebé maka halo prosesu rekrutamentu ba timoroan sira ne’ebé maka hakarak servisu iha rai-li’ur, tanba ne’e maka depois Governu asina tiha akordu Pacific Labour Scheme (PLS) ho programa fulan sia to’o tinan tolu, hatene katak programa ne’e lahanesan ho sazonál nian no PLS ne’e presiza ema skill báziku to’o sertifikadu nivel kuatru, tanba ne’e maka parseiru ne’e importante tebes ho ISAT para servisu hamutuk hodi prepara timoroan sira liga ba nesesidade indústria rai-li’ur nian”, hateten Diretór Jerál Paulo Alves ba jornalista sira hafoin asina akordu ne’e.

Kona-ba Sols hanesan instituisaun ne’ebé loke iha Timór kleur no fó formasaun iha lia-Ingleza, Portugés, Koreia no daudaun Governu koopera ho Koreia no Austrália liuliu haruka timoroan bá servisu iha ne’ebá maka liuhusi kooperasaun ho Sols sira bele fó formasaun iha lia Ingleza, Koreia no se Japaun nesesita duni bainhira asina akordu maka bele forma timoroan sira para responde nesesidade indústria ne’ebé maka aban-bainrua sei presiza sira atu bá servisu iha ne’ebá.

Governu kompromete atu kria postu servisu 60.000 no SEFOPE tenke kontribui porsentu 10, tanba ne’e haree katak importante  ba Timor-Leste atu prepara timoroan bá serbisu, ezemplu, bá Korea Súl tenke hatene lian Korea, Japaun tenke hatene Japaun nia lian, Austrália tenke hatene Inglés, tanba ne’e maka Sols hanesan parseiru importante para prepara formasaun linguístika nian.

Jerente Operasaun Konnekto, Aniceto Pereira Barros, hatete husi parte Konnekto iha hanoin ida atu buka hodi redús dezempregu iha rai-laran liuhusi servisu hamutuk ho Estadu, tanba ne’e koopera hodi fasilita timoroan sira bele serbisu iha estranjeiru.

“Atu bá serbisu iha rai-li’ur Konnekto ho ISAT sei buka empregadór husi rai-li’ur nune’e sira bele simu timoroan sira bá servisu. Ida ne’e maka Konnekto ho ISAT halo ho Estadu Timór nune’e bele emprega timoroan sira serbisu hodi loron ida sira fila mai dezenvolve di’ak liután Timor-Leste”, hateten Aniceto Pereira Barros.

Atu fó formasaun ne’e, Konnekto serbisu hamutuk ho ISAT nu’udar parte ida ne’ebé toma konta ba formasaun nian ba timoroan sira bainhira atu bá servisu ne’ebé tenke hetan treinamentu husi ISAT no nia maka sei halo kooperasaun ho sentru formasaun sira iha Timór laran, nune’e ema sira ne’ebé prepara bele haruka bá servisu hodi hatudu dezempeñu ne’ebé di’ak.

Formasaun ne’ebé Konnekto sujere ba kompañia sira atu bele fornese maka kona-ba ospitalidade, konstrusaun no mós formasaun bá servisu iha tasi nian, aléinde ne’e, haruka timoroan bá servisu iha Irlanda.

Diretora ezekutivu ISAT, Ana Paula da Costa Xavier, esplika, envolvimentu ISAT nian iha nota entendimentu ho Governu ne’e atu prepara timoroan liuhusi formasaun ida ne’ebé maka tuir padraun internasionál para sira bele asesu ba empregu la’ós de’it iha rai-laran, maibé mós iha li’ur.

Kona-ba timoroan sira ne’ebé maka sei tuir treinamentu iha ISAT ne’e sei deside hafoin planu implementasaun ne’ebé sei diskute kle’an ho SEFOPE.

“Ida ne’e hanesan hahú de’it, maibé ISAT la’ós de’it servisu hamutuk ho Governu ho Konnekto maibé mós iha parseiru seluk ne’ebé maka sei kontribui ba programa ida ne’e”.

Ana Paula relata, dezde ezisténsia ISAT fó ona formasaun ba timoroan rihun 10 resin ne’ebé mobiliza bá iha Bayu Undan no Kitan no mós área seluk iha rai-laran no li’ur.

Jornalista: Maria Auxiliadora

Editór: Francisco Simões

 

HAKEREK NO HATÁN

Please enter your comment!
Please enter your name here