Dugong ho Du’ut Tasi. imajen/Ilustrasaun

DILI, (TATOLI)-Sekretáriu Estadu Ambiente, Demétrio do Amaral de Carvalho, halo alerta ida ba timoroan hotu  atu proteje biodiversidade tasi nian, hanesan ‘Dugong no Du’ut Tasi’, tanba iha valór kulturál, ekonómiku, turístika no valór ekolójiku.

“Timoroan tomak tenke halo asaun atu proteje no konserva Dugong no Du’ut tasi iha Timor-Leste nu’udar timor-nia rikusoin ne’ebé ita depende ba,” hateten Sekretáriu Estadu, Demétrio de Amaral, deskreve iha prefásiu livriñu intituladu ´Ita-nia Dugong no Du´ut Tasi: Mai Ita Hamutuk Proteje Ba´.

Iha livriñu ne´e, governante ne´e akresenta katak Timor-Leste riku ho rekursu biodiversidade, inklui biodiversidade rai no tasi nian hodi konsidera katak rekursu biodiversidade tasi ne´ebé importante tebes ba ita-nia moris agora no a futuru.

Maske nune´e, tuir Sekretáriu Estadu Demétrio do Amaral, “ita-nia rekursu biodiversidade barak mak iha ameasa ka risku ba extinsaun, ka atu mohu. Ida ne´e akontese tanba kauza husi hahalok no atividade ita ema nian”.

“Ita lakohi ita-nia rekursu biodiversidade lakon ba bebeik no kontinua mohu. Tanba ida ne’e, ita iha dever atu proteje sira hodi bele eziste nafatin ho ita iha planeta ida ne´e tanba ita-nia moris depende ba sira”, sujere governante ne´e.

Livriñu ho pájina 29 ne´e, Sekretáriu Estadu Ambiente, Demétrio Amaral de Carvalho entrega ona mós ofisiálmente ba Ministra Edukasaun, Juventude no Desportu (MEJD), Dulce de Jesus Soares, hamutuk 2000, iha Eskola Báziku Sentrál Nuu Laran, Bairo Formosa-Díli, Kinta (11/04/2019), hodi fahe ba manorin na´in husi ensinu báziku no mós sekundáriu sira atu utiliza iha estabelesimentu ensinu sira, iha atividade lesionamentu nian, hodi bele iha koñesimu kona-ba rekursu biodiversidade tasi nian ne´ebé iha valór oioin hanesan valór kulturál, ekonómiku, turístika no valór ekolójiku.

Dugong (Karau Tasi) nu´udar espésie ne´ebé iha valór kulturál. Komunidade balun iha Timor-Leste konsidera Dugong nu´udar animál sagradu ka lulik (valór kulturál).

Valór turístiku ne´e, Dugong nu´udar animál ne´ebé iha valór turístiku tanba bele dada turista sira, ne´ebé bele aumenta rendimentu família nian. Tanba Dugong besik mohu, nune´e ita presiza proteje (Konvensaun kona-ba Komérsiu Internasionál ba Espésie ne´ebé iha risku extinsaun limita ka bandu atu fa´an produtu sira ne´ebé halo husi Dugong nia parte isin.

Dugong ka Karau Tasi ne´e nu´udar animál tasi nian ne´ebé tama iha grupu mamíferu (animál ne’ebé hahoris no fó susu oan). Karakterístika Dugong nian mak bele moris tinan naruk (bele moris to´o tinan 70 ka liu). Idade tinan 15-17 mak foin iha oan ka halo reprodusaun.

Oan hela hamutuk nafatin ho inan to´o idade fulan 18. Han du´ut tasi (bele han to´o 40 Kg kada loron) no nu´udar animal herbivora. Dugong adultu nia todan bele to´o 500 Kg no nia naruk metro 3-5. Bele hela iha bee okos to´o minutu 3-12 atu han.

Dugong bele halo viajen to´o kilómetru atus ba atus iha loron hirak nia laran de´it. Dugong iha ligasaun metin ho kultura umanidade nian iha tinan rihun ba rihun nia laran ona.

Dugong ne´e, bazeia ba sondajen ne´ebé halo husi Konservasaun Internasionál (CI-sigla inglés) iha Timor-Leste, identifika katak iha munisípiu 8 ne´ebé sai nu´udar fatin ba Dugong. Munisípiu sira ne´e mak hanesan Baucau (Iha Binagua, Vatabou no Vemase).

Iha Bobonaro (Iha Sanirin no Becou). Iha Covalima (Iha Kuluan no Suai) no iha Díli (Iha Ataúro no Herá Sukaer Laran).

Tuir mai, iha Munisípiu Manatuto (Iha Lamsanak, Obrato no Weheda). Iha Manufahi (Iha Wedauberek, Besusu/Kolokau). Iha Lautém (Iha Loré I, Com no Parlamentu) no iha Liquiça (Iha Ulmera, Dotasi no Maubara).

Husi munisípiu 8 ne´e, munisípiu 4 hanesan Díli (Tasi Tolu), Lautém (Com), Liquiça no Covalima konsidera nu´udar área prioridade ba protesaun no konservasaun Dugong.

Maske Dugong iha valór ne´ebé importante tebes, sira kontinua hetan ameasa oioin. Ameasa ba Dugong kauza barak liuhusi atividade ema nian hanesan mate tanba hetan soke husi ró, hetan kail husi peskadór sira, poluisaun, abitat naturál hetan estraga.

Nune´e mós, iha fatin balun ema peska Dugong atu konsume nu´udar ai-han tanba nia na’an nia sabór hanesan na´an karau ka fahi, no óleu no ruin ema uza nu´udar ai-moruk tradisionál.

Enkuantu, Du’ut Tasi (la´ós budu tasi)-Grupu anjiosperma ne´ebé moris iha tasi, tenke mós proteje tanba importante tebes ba meiu-ambiente tasi nian. Du´ut tasi iha funsaun ekolójiku no ekonómiku, hanesan; nu´udar hahan ba ema no ba animál sira tasi nian, nu’udar hela-fatin (abitat) ba animál sira tasi nian.

Inklui, estabiliza sedimentasaun (Fatuk-rahun no rai-teen, ne´ebé butuk iha área kosteira, bee-lihun no mota), proteje área kosteira husi erozaun tasi nian nomós purifika/hamoos bee.

Du’ut tasi iha funsaun ne´ebé importante ba ema no animál sira seluk. Maske nune´e, du’ut tasi kontinua hetan ameasa oioin. Tuir estimasaun, iha tinan 100 ba kotuk maizmenus 29% área du´ut tasi mak mate. Ita lakon maizmenus 15% área du´ut tasi kada oras; ita lakon área du´ut tasi ho luan hanesan kampu tebe bola nian.

Ameasa sira ne´e akontese tanba poluisaun tasi tanba lixu, prátika agrikultura ne´ebé la sustentável, dezenvolvimentu iha área kosteira nian no eutrofikasaun (poluisaun iha tasi tanba akumulasaun nutritente ne´ebé halo alja sira moris barak hodi prejudika ai-horis sira seluk atu moris).

Tipu du´ut tasi ne´ebé komúm iha Timor-Leste mak sientifikamente hanaran enhalus acoroides, halophila ovalis, thalassia hemprichii, thalassodendron ciliatum, halophila minor, cymodocea serrulata, cymodocea rotundata, ruppia maritima no syringodium isoetifolium, ne´ebé liu 15 no iha espésie 12 mak bele hetan iha illa Ataúro.

Sekretáriu Estadu, Demétrio de Amaral deskreve iha livriñu ne´e konsidera livriñu ne´ebé entrega ba MEJD bele mós sai matéria suplementár ba manorin no estudante sira bainhira hanorin no aprende kona-ba siénsia naturál, biolojia no seluk tan.

Fiar katak informasaun sira iha livriñu ne´e bele aumenta koñesimentu manorin no estudante sira kona-ba protesaun no konservasaun ba espésie sira ne´ebé iha périgu extinsaun, liliu Dugong.

Governante ne´e friza, Timor-Leste nia futuru di´ak depende liu mós ba ninia rekursu biodiversidade tasi no rai nian. Ne´e duni, mai ita hametin ita-nia esforsu no asaun hodi proteje no konserva espésie biodiversidade, liliu sira ne´ebé iha ona périgu extinsaun hodi labele lakon husi ita-nia leet, apela tan Sekretáriu Estadu, Demétrio Amaral deskreve.

Iha fatin hanesan, Ministra Edukasaun, Juventude no Desportu, Dulce de Jesus Soares ba jornalista sira katak livru ne´e importante mós ba MEJD atu uza mós hanesan kurikúlu iha matéria ne´ebé mak relasiona ho meiu-ambiente.

Ministériu apresia tebes asaun ida, ne´ebé mak sekretáriu estadu bele fó mai ministériu edukasaun, nune´e mós permite ministériu edukasaun atu halo impresaun barak liután atu bele tau iha biblioteka sira, nune´e estudante, profesór sira bele uza livru ne´e iha prosesu aprendijazen, hateten ministra.

Governante ne´e informa, MEJD iha diresaun biblioteka nian, ne´ebé kontinua halo monitorizaaun nomós fó formasaun ba profesór sira ne´ebé mak tau-matan ba biblioteka atu nune´e estudante sira bele impresta livru hodi ba uma lee.

“Ohin ha´u hateten tan ba profesór sira, karik iha trimester mai ne´e, ha´u hakarak husi profesór sira prátika, atu fó empresta livru ba alunu sira, depois lorloron atu kontrola katak estudante ida iha uma nia tenke ser lee pelumenus 20 minutu. Iha eskola sira, iha eskola lubuk ida ona, ne´ebé mak estudante sira bele empresta i bele iha rotasaun husi sira ba sira ka dalaruma livru la to´o bele mós empresta.”

Autór ba livriñu ne´e mak Venancio Lopes Carvalho, nu´udar jestór ba projetu konservasaun dugong nomós Jenny House hanesan Ofisiál Konservasaun/Blue Ventures (BV).

Livru ne´e nu´udar edisaun dahuluk; agustu 2018, ho impresaun husi Kompañia X-DIEGO.AF ho pajinadór, José Manuel Sarmento no imajen kapa husi Fergus Kennedy no Fred Short.

Livriñu ne´e hakerek bazea ba projetu konservasaun Dugong no Du´ut Tasi iha Timor-Leste, ne´ebé implementa husi Diresaun Nasionál ba Protesaun no Rekuperasaun Biodiversidade (DNPRB) no parseiru internasionál sira hanesan CI, BV, ne´ebé hetan apoiu finansiál husi GEF (Global Enviromental Facility) liuhusi Mohamed Bin Zayed  Species Conservation Fund (MbZFund).

 Jornalista: Rafy Belo

Editór: Francisco Simões

 

 

HAKEREK NO HATÁN

Please enter your comment!
Please enter your name here