Plenaria Parlamentu Nasionál (PN). Imajen/ António Gonçalves

DILI, (TATOLI) –  Iha diskusaun faze espesialidade ba testu substitutivu projetu Lei Anti-Korrupsaun (LAK) iha komisaun A ne’ebé trata asuntu Konstituisaun no Justisa, membru komisaun sira konsidera presiza aumenta kapítulu ida kona-ba prevensaun.

Antes ne’e iha loron 18 marsu, liuhosi sesaun plenária halo ona diskusaun no votasaun ba testu substitutivu projetu LAK iha faze jeneralidade no konsege hetan votu unanimidade a favór 47 no konkorda atu halo diskusaun iha faze espesialidade iha nivel komisaun.

Deputadu Bankada Partidu Demokrátiku (PD), Adriano do Nascimento, hateten LAK tenke regula parte tolu mak prevensaun, kriminalizasaun no kestaun prosesuál. Maibé testu ne’e rasik seidauk iha kapítulu ida kona-ba prevensaun, enkuantu kriminalizasaun no mós prosesu iha ona.

Deputadu Partidu Demokrátiku, Adriano do Nascimento. Imajen António Goncalves

“Foin daudauk ami konsege diskute to’o artigu 10 resin. Hafoin diskute testu substitutivu ne’e iha idea dehan tenke aumenta tan, entaun ami deside atu fó tempu ba tékniku sira atu elabora kapítulu prevensaun ho ninia artigu lubun ida, nune’e lei ne’e rasik iha nia sistemátika husi prevensaun, penalizasaun no prosesu oinsá atu halo kondenasaun”, tenik ba jornalista sira iha resintu uma fukun, tersa (16/4).

Tuir membru komisaun A ne’e, hafoin elabora membru komisaun sira sei kontinua halo diskusaun iha espesialidade iha fulan maiu nia laran, ho razaun sei halo estudu, haree konvensaun Organizasaun Nasaun Naklibur sira (ONU-sigla portugés) no sei haree lei seluk hanesan kódigu penal, brankamentu kapitál no seluk tan atu tau hamutuk.

“Hafoin análize hodi diskute kona-ba konvensaun ONU nian kona-ba anti-korrupsaun entaun presiza hatama mós iha ne’ebá. Nune’e ami diskute ninia filozofia no ikus mai deside elabora kapítulu kona-ba prevensaun ho artigu lubun ida ne’ebé presiza aumenta tan”, dehan tan.

Projetu lei inisiál ho artigu hamutuk 29 ne’e, aprezenta husi deputadu opozisaun FRETILIN no PD na’in 10 mak Joaquim dos Santos, Francisco Miranda Branco, Aniceto Guterres, Adriano do Nascimento, Antoninho Bianco, David Mandati, Maria Angélica Rangel, Fabião de Oliveira, Lídia Norberta no Nélia Menezes.

Iha biban diskusaun jeneralidade, hafoin rona testu substitutivu, deputadu proponente sira retira projetu LAK no konsidera testu substitutivu ho razaun inkorpora hotu ona.

Testu husi komisaun A ne’e kompostu husi 47 artigu ho objetivu hadi’a no kompleta liután projetu lei orijen ne’ebé mak mai husi proponente sira no asina ona husi membru komisaun A tomak.

Entretantu iha loron 9 jullu 2018, deputadu na’in 10 husi bankada opozisaun FRETILIN no PD aprezenta ba meza projetu lei ne’e no anúnsiu iha plenáriu iha 10 jullu 2018 no iha loron no kedan baixa ba komisaun A para hetan relatóriu paresér.

Iha loron 20 fevereiru 2019, komisaun A hahú konvida entidade kompetente sira hanesan ministériu públiku, Banku Sentrál, Ministériu Justisa, Komisaun Anti Korrupsaun (KAK), Provedoria Direitu Ema-Nian no Justisa (PDHJ-sigla portugés), Majistratura Judisiária, Dekanu Fakuldade Universidade Nasionál Timor Lorosa’e (UNTL), Universidade Dili (UNDIL) no sosiedade sivíl hanesan LABEH, JSMP, CEPAD, Luta Hamutuk, La’o Hamutuk no Fundasaun Mahein, atu halo audiénsia públika.

Antes ne’e iha loron 1 juñu 2011, komisaun simu admisaun ezbosu lei anti korrupsaun hodi rona ideia no rekomendasaun husi parte kompetente sira husi instituisaun Estadu no sosiedade sivíl sira, maske nune’e lei ne’e la konsege hetan aprovasaun no iha revizaun signifikante. Lei ne’e rasik la konsege halo diskusaun no kaduka, tanba situasaun impase momentu ne’ebá.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here