Prezidente CFP, Faustino Cardoso. Imajen/Egas Cristovão

DILI, (TATOLI) – Prezidente Komisaun Funsaun Públika (KFP), Faustino Cardoso, hatete KFP kontinua promove servisu ida ho profisionál ba sidadaun hodi hetan satisfasaun públika ba garante dignidade instituisaun.

“Keixa sira ne’e ami simu, balun liga ho prestasaun servisu, asédiu seksuál, kazu profesór sira iha área remota, hosi saúde simu preokupasaun tanba xefe sentru saúde sira  to’o ohin loron seidauk simu sira ninia subsídiu”, dehan Faustino ba jornalista sira iha Ospitál Nasionál Guido Valadares (HNGV-sigla portugés), ohin.

Keixa sira ne’e, nia dehan simu direta hosi individuál, deputadu sira no publikasaun mídia sira. Atu hadi’a atendimentu servisu ba povu, maka komisaun sei komunika ho ministériu relevante atu tau iha konsiderasaun.

Prezidente KFP ne’e la relata totál númeru keixa hirak maka nia parte simu durante ne’e.

Jullu Sei Realiza Promosaun

Faustino Cardoso hatutan KFP sei realiza promosaun ba funsionáriu públiku ne’ebé naran tama lista promosaun kuaze rihun 13 resin.

Governu da-ualu liuhosi reuniaun konsellu Ministru iha fulan hirak kotuk halo ona alterasaun ba dekretu lei 1/2018 kona-ba rejime promosaun pesoál  funsaun públika hodi implementa promosaun ne’e, maibé presiza tan rezolusaun governu ida hodi define totál vaga ba promosaun ne’e.

“Prosesu ida ami sei hein maka rezolusaun governu kona-ba definisaun ba vaga promosaun”, dehan Cardoso.

KFP sei esforsu oinsá aselera prosesu ne’e hodi implementa iha 2019. Tuir kalendáriu komisaun nian ne’ebé antes ne’e fó sai katak promosaun ne’e tuir loloos realiza iha fevereiru  fulan rua kotuk maibé tenke adia.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here