Primeiru-Ministru, Taur Matan Ruak, hafoin sorumutu ho Prezidente Repúblika, Francisco Guterres Lú Olo, iha Palásiu Prezidensiál Bairru Pité. Imajen Egas Cristovão

DILI, (TATOLI) – Primeiru-Ministru, Taur Matan Ruak, hateten transferénsia osan sosa asaun hosi Governu Timor-Leste liuhusi Timor Gap ba Conocophillips no Shell Energy konklui loron ne’e 16 abril 2019.

“Horisehik no ohin ne’e delegasaun Governu Timor-Leste iha Singapura atu konklui projetu ida ne’e, entaun hahú aban (17/4) Timor-Leste hola parte projetu Greater Sunrise nian ho asaun porsentu 56”, Xefe Governu ba jornalista sira iha Palásiu Prezidente Nicolau Lobato, Bairru Pité, tersa (16/4), hafoin sorumutu ho Prezidente Repúblika, Francisco Guterres Lú Olo.

Xefe Ezekutivu informa sosa asaun ne’e parte hosi esforsu Timor-Leste nian para iha tinan 2025 ne’e dezenvolve mina matan Greater Sunrise no iha dentru tinan 2025-2026 bele hahú fa’an mina.

“Ita nia mehi maka ida ne’e, maibé to’o iha ne’ebá (fa’an mina) ita halo serbisu mate án no buat barak ne’ebé ita presiza halo”, akresenta.

Taur hatutan iha tempu tuir mai ne’e tenke halo preparativu maka’as para apoiu prosesu ne’e la’o ba oin no serbisu saida maka presiza halo ne’e tékniku sira maka hatene.

“Ha’u lakohi espékula buat ne’ebé ha’u nunka kompriende. Tanba ne’e di’ak liu husu ba tékniku sira maka esplika, tanba sira maka hatene”, afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here