Ministra Saúde en ezersísiu, atuál Vise Ministra ba Kuidadu Saúde Primáriu, Élia António de Araújo dos Reis Amaral. Imajen Egas Cristovão

DILI, (TATOLI) – Governu sei dezenvolve setór saúde ho pilar importante hitu  bazeia ba planu estratéjiku  nasionál hahú 2011 to’o 2030 no polítika governasaun da-ualu durante tinan lima 2018 to’o 2023.

Ministra Saúde en ezersísiu, atuál  Vise Ministra ba Kuidadu Saúde Primáriu, Élia António de Araújo dos Reis Amaral, hatete pilar dahuluk mak hadi’a sistema nasionál ba saúde, hadi’a no hasae prestasaun servisu kuidadu saúde, jere no dezenvolve rekursu umanu ba saúde, estabelese no reabilita infraestrutura saúde, jere orsamentu saúde, hala’o no hametin monitorizasaun no mós avaliasaun no haforsa servisu apoiu sira seluk.

Hosi prioridade hirak ne’e, jere no dezenvolve rekursu umanu ba saúde, governasaun ida ne’e sei esforsu atu  prenxe vaga ba kargu  diresaun no xefia, rekrutamentu ba funsionalizmu públiku no formasaun  ba dezenvolvimentu profisionál.

“Parte esensiál ida maka oinsá ministériu saúde halo destakamentu  no distribuisaun ida adekuadu no ekuitativu ba profisionál saúde sira iha nivel prestasaun kuidadu saúde iha territóriu inklui ospitál nasionál Guido Valadares (HGNV-sigla portugés)”, hatete nia iha diskursu bainhira fó pose ba kargu xefia sira iha HNGV, ohin.

Serimónia tomada pose ohin nu’udar kompromisu fundamentál hodi asegura servisu prestasaun kuidadu iha ospitál nasionál.

Papél importante ida  hosi governasaun  da-ualu maka asegura no fortifika sistema nasionál ba saúde  iha nivel hotu no estabelesimentu kuidadu saúde  ba ospitál nasionál, rejionál, munisipál, sentru saúde, postu saúde, SISCA (Servisu Integradu Saúde Komunitária) no saúde iha família.

Atu implementa polítika ne’e,  governu iha  inisiativa sei kontinua orienta ho esforsu hodi garante prestasaun saúde ho kualidade, liuliu hasae kualidade asisténsia saúde ba sidadaun hotu tuir prinsípiu efisiénsia, transparénsia  no profisionalizmu iha jestaun rekursu umanu, finanseiru, materiál, lojístiku, infraestrutura no ekipamentu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here