Komandante Jerál PNTL, Komisáriu Faustinho da Costa. Imajen António Gonçalves

DILI, (TATOLI) – Komandante Jerál Polísia Nasionál Timor-Leste (PNTL), Faustinho da Costa, hateten fronteira terrestre entre Timor-Leste ho Indonézia sei taka provizóriu iha Kuarta (17/4), aban.

“Ita hetan ona pedidu hosi autoridade Indonézia katak iha 17 Abril fronteira terrestre sei taka provizóriu iha parte dadér no loke hikas iha loraik tuku 13:00 tanba eleisaun prezidensiál iha Indonézia”, Faustinho ba jornalista sira iha Palásiu Prezidente Nicolau Lobato, Bairru Pité, Tersa (16/4), hafoin hato’o kestaun ne’e ba Xefe Estadu, Francisco Guterres Lú Olo.

Nia esplika paralizasaun atendementu pasajeiru iha 17 Abril ne’e mós fó impaktu ba migrasaun parte Timor nian, tanba taka provizóriu iha loron refere.

“Klaru katak se ita-nia migrasaun atende maibé se la kontinua ba sorin (migrasaun Indonézia) mós hanesan de’it”, Komandante Jerál ne’e argumenta.

Faustinho katak diretiva hosi komandu PNTL nian hato’o ona ba komandu PNTL munisípiu sira atu asegura ema hotu-hotu hala’o ida-idak nia atividade páskua nian ne’e ho livre.

“Ami kontinua koordena ho parte forsa defeza oinsá atu identifika nesesidade seguransa nian hahú hosi loron boot páskua to’o iha selebrasaun tinan 20 referendu iha agustu mai ne’e”, afirma.

Nia tenik PNTL oras ne’e enfrenta situasaun falta kombustível no manutensaun ba viatura operasionál.

Ba kestaun ne’e, Prezidente Repúblika, Francisco Guterres Lú Olo, husu ba Komandante Jerál PNTL ho nia vise atu koordena ho Ministru Interiór Interinu atu bele solusiona problema ne’e, tanba implika ba atividade operasionál PNTL.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here