SEKOMS Merício Juvinal dos Reis "Akara", ko'alia hela ho Padre Parókia Nossa Senhora do Rosário de Fátima, Iliomar, Padre João Hornay, hafoin Misa Ramos iha Igreja Parókia Nossa Senhora do Rosário de Fátima, Iliomar. Imajen/Rafy Belo

ILIOMAR, (TATOLI)-Sarani Kristaun Katóliku iha mundu rai klaran, Domingu (14/4/2019), selebra festa kmanek no espesiál tebes hodi hananu no hahí “Hosana ba David Nia Oan”.

Tinan-tinan, iha primeiru Semana Santa, tempu Adventu nian, sarani Kristaun Katóliku iha mundu tomak selebra ho festa boot ne’ebé tuir lisan Katóliku Romanu nian bolu dehan Domingu Ramos, hodi hanoin hikas Na’i Jesus nia peregrinasaun nudár Loro Liurai antes tama ba sidade Jerusalém hodi hahú nia sakrifísiu terus nian to’o mate iha Krús atu soi ema hotu husi sala.

Iha istória ema Katóliku nian, antes Jesus nia tempu (antigu testamentu), profeta barak mak mate ho trájiku bainhira sira deside tama sidade Jerusalém.

Jesus hanesan Maromak Nia Oan, hatene ona konsekuénsia hotu atu Nia enfrenta bainhira Nia deside tama Jerusalém, ne’ebé ikus Nia hakotu Nia peregrinasaun iha Jerusalém  ho mate iha krús.

Sarani ua’in sira husi Parókia Nossa Senhora do Rosário de Fátima, Iliomar, Diocese Baucau, loron ne’ebá mós halibur malu ho sira nia Padre Paroquia João Hornay, iha Igreja Nossa Senhora do Rosário Iliomar, Lautem, hodi hala’o mós rutiál Santa Kreda Universal nian iha hodi hahí “Hosana ba David Nia Oan”.

Iha selebrasaun missa Ramos ne’e, Padre Pároku João Hornay iha nia omilia fó hanoin hikas ba sarani sira kona-ba simbou Domingu Ramos, katak sarani sira ida dever boot atu sai instrumentu paz no domin, iha família no sosiedade hodi “kontra” ódiu no vingansa.

“Ramos tahan ne´e símbolu dame, símbolu simplisidade nian. Tan ne´e, maun-alin sira, bainhira ita kaer ramos tahan, sai símbolu dame nian, haraik aan nian. Ita tenke sai sasin, sai instrumentu domin no dame nian”, hateten Pe. João Hornay.

Amu Pároku ne´e hateten lia hirak ne´e tan tuir nia haree iha moris umanidade nian ohin loron alende iha domin no dame maibé mós iha ódiu no vingansa.

“Iha realidade moris kristaun nian ne´ebé sei mosu barak ódiu, vingansa, violénsia. Presiza ita sarani ida-idak sai sasin domin no dame nian. Ita tenke sai instrumentu domin no dame”, afirma Pe. João Hornay.

Jornalista: Rafy Belo
Editór: Francisco Simões

HAKEREK NO HATÁN

Please enter your comment!
Please enter your name here