Prezidente Tribunál Rekursu (PTR), Deolindo dos Santos. Imajen/Egas Cristóvão

DILI,(TATOLI)-Prezidente Repúblika, Francisco Guterres “Lú Olo”, apoia Prezidente Tribunál Rekursu (PTR), Deolindo dos Santos, atu prepara polítika no regulamentu balun ne’ebé bele hadi’a kondisaun servisu autór justisa sira nian, hanesan juis, ofisial justisa no funsionáriu sira iha Tribunál.

Liuhusi audiénsia ho Prezidente Repúblika iha Palásiu Prezidensiál Nicolau Lobato, Bairru Pité, Dili, Segunda (15/4/2019),   Prezidente Repúblika, Francisco Guterres “Lú Olo, tatoli ba Prezidente Tribunál Rekursu (PTR), Deolindo dos Santos, atu bele aselera prosesu julgamentu ba kazu sira ne’ebé mak pendente hela iha Tribunál Rekursu ho Tribunál Distritál  sira.

Prezidente Tribunál Rekursu, Deolindo dos Santos, konfirma katak, total kazu pendente iha Tribunál Rekursu to’o ohin hamutuk 200-resin, kompostu husi prosesu sivíl, krime no seluk tan.

Prosesu kazu ne’ebé pendente hela iha Tribunal Distritál Dili (TDD), tuir PTR Deolindo dos Santos, pruvolta kazu 3.000, kompostu husi kazu sivíl, krime ho seluk tan.

“Iha tribunál balun lao ho di’ak liu tan no balun lao ho forma ho difikuldade. Iha Tribunál Oe-Cussé oras ne’e lao normal, avansu ida maka iha Tribunál Baucau iha agora daudauk ki’ik liu kompara ho Tribunál Dili ho Suai, tanba agora iha de’it 100-resin maka pendente, maibé uluk boot”, informa Prezidente Tribunál Rekursu, Deolindo dos Santos.

Kona-ba kazu pendente iha Tribunál Rekursu, Deolindo  hateten, juiz na’in lima oras ne’e aselera prosesu atu rezolve kestaun ne’e hodi fó justisa ida di’ak ba sidadaun.

Dadus ne’ebé Ajénsia TATOLI asesu, oras ne’e iha de’it juis 30-resin no prokuradór 30 maka destaka iha tribunál sira iha territóriu, tanba ne’e, difikulta prosesu ba aselera kazu pendente sira.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here