Diretór Jerál Autoridade Aduaneira (AA), José António Fátima Abílio. Imajen António Gonçalves

DILI, (TATOLI) – Diretór Jerál Autoridade Aduaneira (AA), José António Fátima Abílio, hatete atu hapara merkadoria ilegál, liuliu importasaun mina liuhusi rai-maran, Governu tenke kria kondisaun no investe iha área fronteira.

“Tenke investe iha área fronteirisa nian, la’ós investe iha rekursu umanu de’it, investe ne’e iha buat hotu, tanba ita haree ekonomia komunidade ne’ebé maka tuur besik iha ne’ebá moris maka ne’e, sira ho atividade ilegál ne’e maka osan ba sira tama lalais liu duké negósiu sira seluk ne’e”, José Abílio afirma iha edifísiu tuan Ministériu Finansa iha área Palásiu Governu nian, ohin.

Tanba ne’e Governu tenke halo investimentu duni no haree para responde ba nesesidade abitante sira-nian (iha fronteira).

“Presiza mós esplikasaun ka konsolidasaun husi instituisaun relevante liuliu agrikultura, komérsiu no turizmu, tanba ita-nia área potensiál barak iha ne’ebá, ita presiza dezenvolve”.

Atu kombate atividade ilegál ne’e, AA buka meiu seluk atu halo kooperasaun ho Indonézia nian atubele asina lalais akordu para bele rezolve ida ne’e.

“La’ós esforsu ne’e husi ita de’it, maibé husi parte Indonézia nian hotu tanba sira mós tenke halo kontrolu iha másimu para komunidade sira ne’e labele fa’an mina mai ita. Tanba públiku haree presu mina ida ne’ebé baratu liu no hetan lukru boot no hola ita-nia ne’ebé karun no lukru dalaruma la hetan, ida ne’e sai kestaun boot”.

Tanba ne’e autoridade lokál (iha fronteira) no abitante sira tuur hamutuk ko’alia no sensibiliza ba rezidente sira ne’e no rona sira-nia preokupasaun iha área saida maka Governu atu fó atensaun hodi dezenvolve para sira bele hapara tiha atividade ilegál sira ne’e.

“Ne’e tenke iha estudu ida ne’ebé maka kle’an para identifika loloos. Tanba ita fronteira, relasaun família sira iha fronteira sorin ne’e iha, ida ne’e maka fó hela marjen para bele halo atividade ilegál”.

Timor-Leste nia fronteira naruk no tasi luan, bainhira halo operasaun konjunta loron ida, rua, loron seluk sira tama hela no difisil para halo kontrolu, mas esforsu halo nafatin.

José Abílio salienta sobre atividade importa mina ilegál ne’e husi parte AA ka’er no Unidade Patrullamentu Fronteira (UPF) mós ka’er, maibé ema kontinua halo no la’ós iha Maliana de’it, maibé iha Salele nia mós hanesan, atividade ilegál sira ne’e la’o nafatin.

Kona-ba atividade ilegál ida ne’e, iha loron 14, kooperasaun entre AA ho eskuadra Polísia Likisá, halo tan apreensaun ba transportasaun mina sein dokumentu ho totál litru 2.335 ka tonelada rua hosi Atabae mai Dili.

Antes ne’e mós iha janeiru, AA halo uluk ona apreensaun mina kuaze tonelada rua.

Jornalista: Maria Auxiliadora

Editora: Rita Almeida

Lee mós :  http://www.tatoli.tl/2019/01/alfandega-halo-apreensaun-ba-mina-ilegal-kuaze-tonelada-rua/

HAKEREK NO HATÁN

Please enter your comment!
Please enter your name here