Prezidente Konsellu Rádiu Komunidade Vox Populi, Lospalos, Jacinto da Costa, tara tais ba SEKOMS Merício Akara, bainhira vizita rádiu Komunidade ne'e. Sábadu (13/04/2019). Imajen/Rafy Belo

LAUTÉM,(TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, kompromete, dezenvolve media estatál, hanesan Rádiu no Televizaun Timor-Leste (RTTL,EP), Ajénsia TATOLI.IP-Ajénsia informasaun ofisiál estadu no mós Rádiu Komunidade sira iha aspetu rekursu umanu, institusionál no mós infraestrutura.

Merício Juvinal dos Reis “Akara” promete mós sei padroniza konstrusaun edifísiu rádiu komunidade sira tuir orientasaun polítika Governu da-ualu nian, atu rádiu komunidade sira labele sente diskriminadu ba malu, hodi presta informasaun ba komunidade.

“Iha infraestrutura, iha polítika, iha hanoin halo standar (padraun), estrutura ba rádiu Komunitáriu sira hanesan, ne’ebé mak ita halo ona iha Baucau, Ainaro, ne’ebé mak nia kondisaun, modelu, ita mak prepara i espera munisípiu sira seluk para hahú ona tau planu i SEKOMS ho diretór hahú prepara kondisaun para prosesa; tinan oin ou rua mai tan, ita bele mós implementa estandarizasaun modelu infraestrutura”, hateten Merício Akara perante jornalista sira bainhira hasoru malu ho Konsellu Rádiu Komunidade Vox Populi, Munísipiu Lautém, Postu Administrativu Lospalos vila, Sábadu (13/04/2019).

Sekretáriu Estadu akresenta, Rádiu Komunidade Vox Populi, Lospalos, nia rezultadu pozitivu tanba sira-nia rezultadu la’o di’ak, sira-nia espíritu voluntarizmu ne’e maka’as dezde inísiu to’o agora, Prezidente Konsellu, Jacinto da Costa, kolabora di’ak ho jestór, jornalista sira mós servisu di’ak ho voluntáriu.

Pontu importante ida hato’o husi rádiu komunitáriu Vox Populi, Lospalos, tuir Merício Akara, konsege produz jornalista di’ak sira balun, ne’ebé daudaun ne’e hala’o mós kna’ar jornalista nian iha nivel nasionál. Prosesu sira ne’e hatudu sinál pozitivu katak rádiu komunidade ne’e mós fó inspirasaun di’ak, esperiénsia di’ak, ajuda duni informasaun entre governu no sidadaun no mós fasilita informasaun husi sidadaun.

“SEKOMS iha polítika rua ka tolu hanesan ha’u mensiona; ida nível finansiamentu, ha’u dehan tiha ona ba ita-nia diretór nasionál (Abel da Conceição-red) para orsamentu mak ita prevee US$240.000,00 bele hahú ona halo jestaun para bele transfere ba rádiu komunidade sira atu bele hala’o sira-nia kna’ar”.

Kestaun tékniku operasionál, Merício Akara hateten, diretór mak sei haree maibé kompromisu Oitavu Governu Konstitusionál kontinua apoia.
Iha fatin hanesan, Prezidente Konsellu Rádiu Vox Populi, Jacinto da Costa informa ba jornalista sira katak, problema ne’ebé sira-nia rádiu enfrenta mak la iha transporte no la iha meius.

“Dalaruma ekipamentu servisu hanesan gravadór ne’ebé mak menus, jornalista sira ne’ebé mak la to’o ba kobre iha área hotu”, hateten Jacinto da Costa.

Jacinto mós informa katak sira-nia rádiu iha jornalista na’in neen no transporte la iha, dalaruma difikulta sira ba halo kobertura ba informasaun sira. Tanba ne’e, liuhusi transferénsia públika ne’ebé governu sei halo liuhusi SEKOMS bele apoiu rádiu komunidade sira hotu, la’ós iha Lospalos de’it, no orsamentu ba ekipamentu servisu nian; bele mós surat-tahan bele fasilita servisu jornalistiku nian.

RKLM mós menus rekursu

Husi sorin seluk, Prezidente Konsellu Rádiu Komunidade Lian Matebian Baucau (RKLM), Albino Alves Soares “Sakoko”, informa, difikuldade ne’ebé RKLM hasoru mak menus rekursu, liuliu jornalista ne’ebé presiza iha kapasitasaun oinsá iha kualidade di’ak nune’e bainhira tuun ba baze, entrevista karik, bele halo informasaun di’ak ba públiku.

Difikuldade seluk tan mak transporte, iha rua maibé ida aat ona, nune’e la bele akumula informasaun hothotu iha baze.

“Ba Rádiu Komunidade Lian Matebian Baucau, difikulta buat rua; Vemasse no Baguia la hetan informasaun tanba la to’o ho razaun katak FM (Frekuénsia Modulasaun) labele liu kle’an ou foho. Seluk mós dalaruma antena ladún aas no fatin ladún favorese”, Albino Sakoko hateten.

Hatán ba preokupasaun sira ne’e, Diretór Nasionál Sentru Rádiu Komunidade, Abel da Conceição informa katak SEKOMS liuhusi Diresaun Sentru Rádiu Komunidade iha kompromisu atu kontinua apoiu ba rádiu komunidade sira iha Timór laran tomak.

“Ha’u fó hatene ona katak ita antes halo transferénsia fundu, ita sei liuhusi preparasaun diresaun CRC (Sentru Rádiu Komunidade-sigla portugés) trasa ona; ne’e mak primeiru ita halo assesment (avaliasaun)”.

Tuir Diretór Abel da Conceição katak liuhusi avaliasaun ne’e mak sei hatene situasaun rádiu ida ho rádiu seluk. “Iha CRC ita prepara ona formatu ida, rádiu komunidade hotu sei formaliza, aprezenta sira-nia proposta, maibé iha ne’ebá iha parte balun fó hela situasaun balun ne’ebé la hanesan, aprezenta tuir ida-idak nia kondisaun.

Diretór ne’e relata katak rádiu komunidade 16 iha territóriu no politikamente sei apoiu 15.000 kada tinan maibé haree mós ba rezultadu avaliasaun. “Rádiu sira ne’ebé mak depois assesment ne’e nia jestaun la’o di’ak iha direitu hetan 15.000. Maibé, rádiu sira ne’ebé nia jestaun la di’ak, ita redús alokasaun. Ita iha comitment hadi’a sira, sira bele hetan fali direitu hanesan rádiu sira ne’ebé nia jestaun di’ak”.

Totál orsamentu ba apoiu rádiu komunidade 16 ne’e hamutuk US$ 240.000,00. “Politikamente ita tau, mas alokasaun posivelmente hothotu sei la hetan hanesan. Ne’e mak ita halo assesment”, tenik Abel da Conceição.

Jornalista: Rafy Belo
Editór: Francisco Simões

HAKEREK NO HATÁN

Please enter your comment!
Please enter your name here