Misa domingu ramus iha Igreja Katedrál Dili. Imajen António Gonçalves

DILI, (TATOLI) – Bispu Dioseze Dili, Don Virgílio do Carmo da Silva, hateten la’ós ramus sanak iha liman ne’e importante maibé buat ne’ebé importante liu maka vontade ida atu hahú dalan ida ne’e (hakat tuir Jesus nia dalan krús).

“Maske ita ho entuziazmu la’o tuir Jesus ohin maibé labele hotu de’it iha Uma-Kreda, ka misa ramata ita nia domin nu’udar ramus hotu iha ne’e. Ne’e la to’o. Nia só fó folin liu mai ita no aas liu bainhira ita haree dalan ne’ebé ohin ita hahú ne’e tenke kontinua to’o Jesus nia mate no Jesus nia moris hi’as”, Bispu hateten liuhusi ninia omilia bainhira dirije misa Domingu Ramus iha Igreja Katedrál, Domingu (14/4).

Nia explika selebrasaun ne’e Domingu Ramus ne’e deskreve sarani sira nia istória no moris loron-loron nian.

“Iha ita nia moris loro-loron ne’e buat rua ne’e sempre iha atu karateriza buat ne’ebé alegria, ksolok no mós iha parte seluk iha buat ne’ebé bolu terus, sofrimentu. Iha ita-nia moris loro-loron iha matan-been maibé iha mós hamnasa. Iha ita nia moris loro-loron ita haksolok tanba susesu maibé mós iha insusesu”, katak tan.

Iha erru, nia hatutan : “Hirak ne’e hotu hola parte iha ita-nia moris nu’udar eskolante dixípulu ita Na’i Jesus Kristu nian. Ida ne’e drama ida ne’ebé konsege hatudu ne’ebé reflete ita-nia sentimentu sira”, Bispu haklaken.

Semana Santa ne’ebé hahú ho Domingu Ramus ne’e, nia tenik, konvite ida ba sarani sira atu tuir Jesus nia dalan krús ninian ba to’o iha Ninia mate no Ninia moris hi’as.

“Momentu di’ak ba ita atu tuir. Nune’e de’it maka ita deskobre fila fali sentidu mistériu páskua ninian no sentidu ksolok sarani ninia, sentidu ksolok auténtiku ne’ebé mai hosi ita Na’i Jesus Kristu ne’ebé festa páskua ninian lori mai ita iha tinan ida ne’e”, lider Igreja Katólika ne’e haktuir.

Partisipa iha misa ne’e maka Prezidente Repúblika, Francisco Guterres Lú Olo, ho nia espoza, eis ministru balun no sarani sira.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here