Sekretáriu Estadu Komunikasaun Sosiál (SEKOMS), Merício Juvinal dos Reis “Akara” halo enkontru ho Prezidente Autoridade Munisípiu Baucau, António Guterres, iha Baucau, Sesta (12/04/2019). Imajen/Rafy Belo

BAUCAU, (TATOLI)-Sekretariu Estadu Komunikasaun Sosiál (SEKOMS, Merício Juvinal dos Reis “Akara”, tuun ona ba Munisípiu Baucau no sei liu ba Lautem, hodi halo ‘konsolidasaun’ ba planu no programa Governu da-ualu nian.

Intermus dezenvolvimentu órgaun komunikasaun sosiál Estadu nian ne’ebé tutela ba SEKOMS, hanesan Rádiu Televizaun Timor-Leste (RTTL,EP), Ajénsia TATOLI.IP-Ajénsia informasaun ofisiál estadu Timor-Leste nian no mós rádiu komunidade sira iha territóriu, governu kontinua fó apoiu atu bele hala’o nia knar ho di’ak hodi transmite informasaun husi nasionál ba baze no husi baze ba nasionál.

Sekretáriu Estadu Komunikasaun Sosiál (SEKOMS), Merício Juvinal dos Reis “Akara” hateten, sorumutuk ho autoridade munisípiu sira atu introdús hanoin, planu no programa governu nian.

“Ha’u informa ba administradór katak ita iha ona planu atu dezenvolve, kontinua apoiu rádiu komunidade hanesan meius ida besik ita-nia komunidade para fó informasaun mais atuál no mós informasaun mai husi komunidade para transmite fali ba nasionál i mós meius komunikasaun estadu nian seluk hanesan RTTL”,  esplika Sekretáriu Estadu, Merício Akara ba jornalista sira iha edifísiu Administrasaun Munisípiu Baucau, Sesta (12/04/2019).

Daudaun ne’e, Mericio Akara hateten, 48% sidadaun Timoroan asesu RTTL no SEKOMS iha tarjetu atu tinan oin hasa’e tan persentajen asesu RTTL nian. Tanba ne’e, SEKOMS sei identifika fatin balun iha Munisípiu Baucau atu harii torre RTTL foun iha Baucau atu fasilita liután informasaun husi mídia estatál ne’e atu komunidade sira bele asesu.

“Apresia, administradór hateten katak sei kolabora di’ak, sei apoia planu ida ne’e para RTTL prosesa torre foun. Ida ne’e ita atu aproveita; rádiu komunidade, RTTL no hothotu bele aproveita para fó asesu liután ba ita-nia komunidade”, hateten Merício Akara.

Iha enkontru ho Prezidente Autoridade Munisípiu Baucau, António Guterres,  SEKOMS Merício Akara, informa mós kona-ba ezisténsia Ajénsia TATOLI.IP nian ne’ebé to’o agora seidauk kobre to’o munisipiu tanba sei menus rekursu.

“Ba oin, Ajénsia TATOLI bele mós iha reprezentasaun iha munisípiu para bele kolabora ho rádiu komunidade iha Baucau ho reprezentante RTTL para parte tolu ne’e bele iha koordenasaun servisu, apoiu serbvsu tanba sira-nia objetivu ne’e ida de’it; divulga atividade governativa, fasilita informasaun sidadaun nian para governu lokál, governu sentrál bele intende, akompaña beibeik para bele fó prioridade di’ak liu, bele design planu di’ak liu. Meius komunikasaun tolu ne’e mak sai objetivu enkontru SEKOMS nian iha Baucau”, hateten Merício Akara.

Iha fatin hanesan, Prezidente Autoridade Munisípiu Baucau, António Augusto Guterres, ba mídia sira hateten katak, polítika governu sentrál saida de’it mak iha, programa, prioridade ne’ebé governu fó tuun mai ba munisípiu ida-idak , relativamente ho Munisípiu Baucau nian katak aumenta torre hodi hasa’e frekuénsia rádiu no televizaun ninian, depois mós aproveitamentu iha rádiu komunidade sira nia iha ne’e para fó asesu ba komunidade. Ne’e signifika katak hakbesik governu ba povu no mós rona povu nia informasaun, lamentasaun ruma husi baze kanaliza husi meius komunikasaun sosiál sira.

“Ida ne’e ha’u prontu apoiu no kolabora, asegura, to’o iha implementasaun”, hateten António Guterres, hodi subliña mós katak, kona-ba rai, tékniku RTTL identifika rai ida ne’ebé apropriadu atu harii torre, partilla informasaun ba autoridade Munisípiu Baucau, atu bele hamutuk hodi bele apróxima ho komunidade sira ne’ebé hela besik fatin identifikadu.

Durante iha Baucau, SEKOMS hala’o vizita ba Rádiu Komunidade Lian Matebian (RKLM), observa área torre Timor-Telekom (TT) iha Vila Nova, Baucau hamutuk ho tékniku RTTL balun tanba tuir peskiza preliminária posibilidade identifikadu hodi harii mós torre RTTL.

Ekipa SEKOMS alende Sekretáriu Estadu Merício Akara, inklui mós Xefe Gabinete SEKOMS, Júlio Gonçalves, Diretór Nasionál Sentru Rádiu Komunitáriu, Abel da Conceição no mós jornalista sira.

Tuir ajenda katak, ohin,  SEKOMS sei hasoru mós autoridade Munisípiu Lautem, inklui  vizita Rádiu Komunidade Lospalos. SEKOMS sei fila hikas ba Dili iha Domingu. Maske nune’e, tuir mós planu, hamutuk ho ekipa sei observa mós fatin ba torre RTTL nian, iha área Triloka, Baucau, no mós Rádiu Kolele Mai, Bucoli.

Antes ne’e, SEKOMS mós vizita ba rádiu komunidade Rai Husar, Aileu, Rádiu Mauloko, Maubise, Rádiu Komunidade Ermera, Ainaro, Rádiu Komunidade, Iliwai, Manatuto no seluk tán.

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here