SECoop, Arsenio Pereira da Silva, hamutuk ho autoridade lokal Munisípiu Manufahi, Sábadu (13/4/2019), kolleita batar ektare 32-resin iha Munisípiu Manufahi. Imajen/Media SECoop

MANUFAHI, (TATOLI)—Sekretáriu Estadu Kooperativa (SECoop), Arsenio Pereira da Silva, hamutuk ho autoridade lokal Munisípiu Manufahi, inklui to’os na’in sira, Sábadu (13/4/2019), kolleita batar hamutuk ektare 32-resin husi Kooperativa Produsaun Aidak Laran iha Aldeia Bee Metan, Suku Betano, Postu Administrativu Same, Munisípiu Manufahi.

SECoop  Arsenio Pereira da Silva, fó parabens ba Kooperativa Produsaun Agríkola Aidak Laran ne’ebé mak iha ona inisiativa rasik hodi halo produsaun ba batar, maske ho kuantidade ne’ebé mak natoon maibé komesa ona kontribui ba kreximentu ekonomia iha família laran.

Biban ne’e, SECoop partilla mós programa  Governu  da-ualu nian, liuliu programa Sekretáriu Estadu Kooperativa nian mak  fokus liu ba kooperativa produsaun agríkola, maibé integra mós ho kooperativa ramos sira seluk.

Komunikadu imprensa husi gabinete Media SECoop nian, informa katak, Sekretáriu Estadu mós iha planu atu ba oin sei halo liña koordenasaun ho Ministériu Agrikultura no Peska hodi nune’e evita servisu dupla iha Governasaun ida nia laran.

SECoop promete mós sei halo asina akordu ho Universitáriu sira iha territóriu laran tomak, liuliu estudante sira ne’ebé mak estuda iha área agrikultura nian, nune’e bainhira ramata sira nia estudu fila mai kampu hodi fó apoiu ba produtór sira.

Prezidente MOKATIL Munisípiu Manufahi, Domingos de Jesus, iha ninia entrevista ho jornalista sira hateten, kolleita batar ne’e hanesan fanun to’os na’in sira atu prodús halo barak liu tan hodi minimiza ai-han importasaun.

“Faze da-uluk ne’ebé mak ohin ita hahú kolleita ne’e hanesan faze fó hela mensajen badak ida ba to’os na’in, oinsá mak iha futuru produtór sira prodús kontinuasaun”, hateten Domingos de Jesus.

Prezidente MOKATIL ne’e mós promete katak iha tinan ida ne’e, kooperativa produsaun agríkola sei servisu hamutuk ho Oitavu Governu Konstitusionál liu-liu SECoop atu halo produsaun ba rai abandonadu hamutuk ektare 600 hodi nune’e bele garantia soberania ai-han rasik.

“Se ita kontinua konsumu ai-han husi rai liur signifika ita rasik mak lagosta ita nian ai-han rasik no ita rasik mak hakiak venenu ida ita nia isin lolon”, hateten Domingos.

Iha tempu hanesan Prezidente Kooperativa, Maneqas Oliveira, hato’o sira nian preokupasaun mak kona-ba prodús barak, maibé susar atu asesu ba merkadorias ne’e sira rekomenda ba Governu atu hakbesik merkadu ba Produtores sira.

“Fallansu ne’e mak durante ne’e Produtores hetan iha baze mak mekadoria la besik, maibé ho prezensa SECoop nia prezensa hodi kolleita direita batar hirak  ne’e hanesan motivasaun ida mai agrikultór sira atu prodús halo barak liu tan.

Nia garante katak bainhira projetu tasi mane la’o, produtór sira iha kosta súl prontu atu fó han ba traballadór sira. Maibé durante ne’e difikuldade hirak ne’ebé kooperativa sempre hasoru iha baze mak menus ekipamentu pezadu hodi fila rai ektare ne’ebé luan.

“Ami komunidade sira badinas atu prodús halo barak, maibé ekipamentu pezadu mak difikuldade ami nia atividade hanesan tratór hodi fila rai tanba durante sira aluga mákina ema nian fila sira nia rai hodi rekomenda ba Governu liu-liu ministériu kompetente atu haree ba asuntu ida ne’e”.

Partisipa iha kolleita batar ne’e mak hanesan reprezentante PNTL Munisípiu Manufahi, autoridade lokál no membru kooperativa sira.

EKIPA

HAKEREK NO HATÁN

Please enter your comment!
Please enter your name here