DILI,(TATOLI)-Sekretaria Estadu Seguransa Sosiál (SESS) Portugal, Cláudia Joaquim, ohin, hasoru malu ho Ministru Negósiu Estranjeiru no Kooperasaun Timor-Leste, Dionísio da Costa Babo Soares, hodi transmite kona-ba planu kooperasaun ne’ebé rai rua sei asina iha Tersa (16/4/2019), ba programa sosiál sira hodi hahú implementa iha 2019 to’o 2022.
“Protokolu ne’e kontinuasaun hosi protokolu tuan kona-ba kooperasaun ba dezenvolvimentu iha projetu barak iha Timor-Leste”, informa SESS Portugal, Cláudia Joaquim ba Jornalista sira iha Edifísiu Ministériu Negósiu Estranjeiru no Kooperasaun (MNEK), Praia dos Qoqeiros, Dili.
Governante Portugal ne’e dehan, programa ida maka apoiu ba labarik no idozus, reforsa dezenvolvimentu instituisaun intermus kapasitasaun no dezenvolvimentu jurídiku ba lei seguransa sosiál, protesaun sosiál no seluk tan. Tanba ne’e, Cláudia konsidera kooperasaun ne’e importante ba nasaun rua hodi apoiu prosesu dezenvolvimentu Timor-Leste.
Iha Biban ne’e, Ministru Negósiu Estranjeiru no Kooperasaun Timor-Leste, Dionísio da Costa Babo Soares, hateten, hafoin Timor-Leste restaura ninia independénsia iha 20 Maiu 2002, estabelese ona pakote programa kooperasaun tolu ho Portugal, pakote da-uluk maka programa indikativu ba kooperasaun ne’e remata ona, programa anuál ba kooperasaun mós finaliza ona no programa ikus ne’ebé Konsellu Ministru aprova ona ho naran programa estratéjiku ba kooperasaun ho Portugal ne’ebé rai rua sei asina iha fulan Juñu 2019 iha Lizboa-Portugal.
Programa kooperasaun da-ikus ne’e, sei abranje ba área edukasaun, seguransa sosiál, defeza no Seguransa, Turizmu, Saúde no seluk tan, hodi implementa durante tinan tolu (2019-2022).
Vizita Sekretaria Estadu Seguransa Sosiál Portugal, Cláudia Joaquim mai Timor-Leste atu estabelese akordu kooperasaun ho Ministériu Solidariedade Sosiál no Inkluzaun (MSSI) iha área inkluzaun sosiál liuliu ba grupu vulneravel sira hodi hetan protesaun sosiál no dezenvolvimentu institusionál.
Ministru Dionísio Babo ho SESS Portugal, Cláudia Joaquim ko’alia mós kona-ba planu atu apoiu MSSI hodi kria rede servisu ida hodi liga direta ho NGO no organizasaun sosiál sira ne’ebé fó apoiu direta ba grupu vulneravel sira atu nune’e bele estabelese koordenasaun servisu ida di’ak liu tan ba sidadaun.
Jornalista: Agapito dos Santos
Editór: Francisco Simões
