DILI,(TATOLI)-Governu Timor-Leste iha ona planu sei estabelese embaixada permanenti ida iha Índia atu hametin kooperasaun bilateral entre nasaun rua.
“Se buat hotu lao di’ak, tinan ida ne’e, ita komesa ona estabelese embaixada iha Índia”, hateten Ministru Negósiu Estranjeiru no Kooperasaun Dionísio da Costa Babo Soares, ba Jornalista sira, ohin, iha ninia kna’ar fatin, MNEK, Praia dos Qoqeiros, Dili.
Dionísio Babo akresenta, Estadu foti desizaun ne’e tanba kestaun da-uluk maka Timor-Leste seidauk estabelese ninia embaixada iha Ázia Leste no Ázia Sudeste. Da-ruak, haree ba iha ámbitu kooperasaun ho sira durante ne’e no sira mós iha interese atu harii sira ninia embaixada iha ne’e nomos entermus jeo polítiku no estratéjiku importante polítika esterna la’ós deit rejiaun, maibé iha mundu internasionál.
Iha parte seluk, iha tinan ne’e, estadu Timor-Leste mós deside sei taka ninia embaixada iha Angola no Afrika du súl tanba problema orsamentu. Kustu aluga uma iha nasaun rua ne’e karun kada tinan gastu besik dollar rihun US$500, atividade polítika la dun intensivu no distánsia do’ok. Tanba ne’e, governu konsiente atu hamenus gastu orsamentu ne’e hodi loke fatin embaixada iha nasaun sira membru konsellu seguransa nasaun unidas hanesan Rúsia no França ba futuru tanba fó liu vantajen intermus jeo polítika no estratéjia ba diplomasia esterna iha mundu.
Enkuantu, embaixadór la’ós rezidénsia Timor-Leste nian iha Nasaun Mozambique maka sei reprezenta servisu ba Afrika do súl no Angola hanesan mós embaixadór Timor-Leste iha Portugal maka oras ne’e kobre iha Cavo-verde no CPLP no iha Bruxelas maka kobre ba França.
“Ita sei iha de’it reprezentasaun hosi Maputo Mozambique maka reprezenta iha Pretória no Luanda ne’ebé karta ne’e haruka ba hotu no ministru sira iha ne’ebá konkorda hotu ona”, esplika Dionísio Babo.
Jornalista: Agapito dos Santos
Editór: Francisco Simões
