Embaixadór Japaun iha Timor-Leste, Hiroshi Minami. Imajen Egas Cristovão

DILI, (TATOLI) – Governu Japaun liuhosi nia Embaixada iha Timor-Leste deklara mantein apoia Timor-Leste ba konstrusaun aeroportu Internasionál Nicolau Lobato, Komoro.

“Ha’u hanoin katak embaixada Japaun ho Governu Timor-Leste halo ona komunikasaun maka hamosu sala kompriensaun ba entendimentu ida, maibé governu Japaun nia pozisaun la iha mudansa”, Embaixadór Japaun iha Timor-Leste, Hiroshi Minami, bainhira esklarese liuhosi konferénsia imprensa ne’ebé halo iha Embaixada Japaun, ohin.

Nia subliña: “Ha’u hanoin katak entre Embaixada Japaun ho Governu Timor-Leste nia pozisaun la iha mudansa ba konstrusaun aeroportu Internasionál Nicolau Lobato”.

Hiroshi fó sai deklarasaun ne’e, atu hatán ba notísia ne’ebé fó sai hosi meius komunikasaun sosiál balun katak Governu Japaun deside la aprova projetu konstrusaun Aeroportu Internasionál Nicolau Lobato.

“Ha’u hanoin katak agora dadaun embaixada Japaun halo diskusaun ho Ministériu Negósiu Estranjeiru no Kooperasaun, no preparasaun la’o di’ak hela”, afirma tan.

Tanba ne’e maka Governu Japaun sei ajuda Estadu Timor-Leste hodi hadi’a aeroportu, enkuantu Governu Japaun sei halo desizaun formál kona-ba projetu ne’e iha 23 abríl 2019.

Totál orsamentu ba konstrusaun obra ne’e maka $44 milliaun. Entretantu, konstrusaun ba aeroportu ne’e sei hahú iha marsu 2020, nune’e sei remata iha fulan 20 nia laran, hafoin entrega ba Governu Timor-Leste.

Jornalista: Zezito Silva

Editora: Rita Almeida

Japaun Sei Konstrui Komponente Lima  Iha Aeroportu Internasionál Komoro

 

HAKEREK NO HATÁN

Please enter your comment!
Please enter your name here