iklan

NASIONÁL, INTERNASIONÁL, EDUKASAUN, DESPORTU, DILI, MUNISÍPIU

TL Preparadu Sai “Uma Na’in” ba Jogu CPLP

TL Preparadu Sai “Uma Na’in” ba Jogu CPLP

Reuniaun Komisaun Desportu da Juventude no Desportu (CMJD), CPLP. Imajen/SEJD

DILI, (TATOLI)-Timor-Leste nudár “uma na’in” preparadu ona atu organiza kompetisaun futeból internasionál komunidade husi nasaun ho lian Portugés (CPLP-sigla portugés) ne’ebé atu realiza iha tinan 2020.

Liuhusi publikasaun media Sekretáriu Estadu Juventude no Desportu (SEJD), foin lalais ne’e, Sekretáriu Estadu Juventude no Desportu,  Nelio Isaac Sarmento, hateten, teknikamente no finansiamentu Timor-Leste preparadu realiza jogu CPLP ba tinan 2020.

Nelio Isaac Sarmento, hateten, fila fali ba membru CPLP sira kuandu sente jogu ne’e CPLP nian duni, entaun tenke lori duni sira-nia delegasaun atleta atu nune’e bele festeja hamutuk iha Timor-Leste.

“Reuniaun ne’e, iha país rua de’it mak partisipa mak Cabo Verde no Portugal, labele diskusaun ba ajenda ne’ebé mak Timor-Leste hakarak aprezenta prósimu jogu CPLP tuir mai. Entaun tuir mai ita aprezenta ita-nia kondisaun sira mós satisfás ba preparativus”, esplika Nelio Isaac Sarmento.

Em termos de prepara ba jogu ne’e, buat hotu iha tiha ona, instalasaun desportiva, prepara ba transporte, ba saúde, seguransa, modalidade desportu, ita prepara hotu ona, agora hein de’it oinsá mak kompromisu polítiku kada país liuhusi sira-nia ministru desportu, sira atu haree jogu CPLP ne’e hanesan eventu ida ne’ebé mak CPLP nian. Entaun, ita prósimu jogu CPLP bele partisipa no ativu liután no bele lori atleta ne’ebé iha modalidade sia ne’e ne’ebé mak ita ohin aprezenta ba ne’e”, hateten Nelio Isaac.

Tuir divulgasaun media SEJD nian ne’e, Prezidente Institutu Portugés Desportu no Juventude (IPDJ), Vitor Pataco, kongratula Timor-Leste ba reuniaun Komisaun Desportu CMJD CPLP maski la hetan partisipasaun másimu husi nasaun CPLP sira. Nune’e mós, Diretór Jerál Desportu Cabo Verde, Anildo dos Santos rekoñese, katak haree husi aspetu fasilidade, Timor-Leste bele ona sai uma na’in ba jogu CPLP.

Tuir planu iha modalidade desportu ualu (8) mak sei hala’o iha jogu CPLP, kompostu husi  Modalidade desportiva sira ne’e mak hanesan Atletizmu, Basketeból (feto 3×3), Futeból (mane), Taekwondo (Feto ho Mane), Voleiból Praia (feto ho mane), Karaté (feto ho mane), Xadrés (feto ho mane) no Tenis Kampu (Feto ho Mane).

Nasaun membru CPLP sira mak hanesan Angola, Brazil, Cabo Verde, Guiné Bissau, Guiné Equatorial, Moçambique, Portugal, São Tomé e Principé no Timor-Leste.

Reuniaun Komisaun Desportu da Juventude no Desportu (CMJD), CPLP, ne’ebé hala’o iha Timor-Leste ne’e, komisáriu sira mós vizita infraestrutura desportiva no otelaria iha Ermera no Dili, iha loron 8 Abril 2019.

Jornalista: Rafy Belo

Editór: Francisco Simões

iklan
iklan

Leave a Reply

iklan
error: Content is protected !!