Benefisiáriu sira (estudante) entuziazmu partisipa iha lansamentu ne’e (ICT) ne’ebé hala’o iha edifísiu alfándega, Palaban. Imajen hosi FB ZEESM

OEKUSI, (TATOLI) – Prezidente Autoridade Rejiaun Administrativa Espesiál Oekusi-Ambenu (RAEOA), Marí Alkatiri, ohin lansa programa Informasaun Teknolojia no Komunikasaun (ICT-sigla inglés) ho objetivu estudante sira bele hahú uza ICT iha eskola.

“Ita mai iha ne’e hodi lansa programa importante ida maka Informasaun Komunikasaun no Teknolojia atu estudante sira bele aplika ona iha eskola”, dehan nia iha ámbitu lansamentu ne’ebé hala’o iha edifísiu Alfándega, Palaban.

Autoridade ne’e apela ba estudante sira atu fó aan tomak hodi aprende ho vontade atu bele hetan koñesimentu tékniku ka domina iha área ICT, nune’e vida bele di’ak liu hosi ohin no ba oin.

Nia akresenta lansamentu ICT ne’e atu aumenta kualidade edukasaun. Ida ne’e investimentu nasionál, tanba edukasaun fundamentál tebes atu prepara ema sai ema ne’ebé ho loloos hodi dezenvolve Timor-Leste sai matak no buras ba futuru.

Entretantu, program ida ne’e susesu tanba servisu hamutuk ho Organizasaun hosi Nasaun Naklibur sira ba Programa Dezenvolvimentu (PNUD-sigla portugés) no hetan apoiu hosi Governu India, no benefisiáriu hosi programa ida ne’e maka mai hosi estudante hamutuk rihun lima.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here