Ministru Obras Públikas, Salvador Soares dos Reis Pires. Imajen António Goncalves

DILI, (TATOLI) – Ministru Obra Públika (MOP), Salvador Eugénio Soares dos Reis Pires, hateten atu prevene okupasaun iha área proibida hanesan ponte iha área urbana, ministériu halo hela lejizlasaun.

“Ami haree hela, no agora ami nia ekipa halo atuasaun atu halo prevensaun hodi okupasaun ne’e la aumenta, ita tenke iha lei ne’ebé vinkulativu. Agora lei ne’e ami halo hela hodi prevene okupasaun ilegál iha área proibida”, tenik nia ba jornalista sira iha uma fukun, kuarta, (10/4).

Loron hirak liubá Diresaun Nasionál Estada, Ponte no Kontrola Inundasaun (DNEPCC-sigla portugés) kontinua hala’o atividade monitorizasaun ba ponte no estrada ne’ebé foin inaugura iha 2018 nia laran no momentu ne’ebá hasoru negosiante balun komesa okupa fatin mamuk iha Ponte Hinode nia rohan, nune’e parte ministériu buka hela solusaun hodi rezolve.

Nia hatutan : “Sei okupasaun sira iha nanis ona, ita tenke iha solusaun  para muda sira no sira labele okupa fali okupasaun ilegál seluk, tanba ida ne’e aumenta problema seluk, ida ne’e mak governu tenta hela atu prevene”.

Salvador Pires haktuir Lei Ordenamentu Territoriál nu’udar baze ne’ebé aprova ona iha 27 agostu 2018. Nune’e mós governu iha ona programa abitasaun ne’ebé atu revitaliza bairru sira no halo mós uma ba komunidade ne’ebé nia alvu ba ema kbiit laek sira no ba komunidade ne’ebé hela besik mota.

“Nune’e, ita rezolve problema no la kria problema sosiál ne’e ba fali komunidade”, dehan.

Entretantu, haktuir iha pájina DNEPCC ekipa téknika husi diresaun ne’e hala’o soru-mutu ho Xefe Suku Komoro, Eurico Santos, no mós komunidade iha área refere no esplika área ponte ne’e Estadu kompensa ona no labele iha atividade besik ponte ne’e ho razaun espasu ne’e Governu mak bele deside atu halo seda.

Nune’e mós ekipa DNEPCC esplika la seguru ba komunidade atu besik ponte ho tráfegu rodaviáriu ne’ebé liu ba mai ho ida ne’e se mak la tuir prosedimentu mak ekipa sei sobu.

Husi parte komunidade, negosiante katak sei la aseita atu muda no husu tanba sá fatin seluk ema livre fa’an to’o iha estrada ibun maibé sira rasik labele.

Ho razaun ne’e mak DNEPCC sei entrega ba autoridade kompetente sira hodi bele rezolve ho lei ne’ebé vigora ona.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here