Ministru Justisa, Manuel Cárceres da Costa. Imajen Egas Cristovão

DILI, (TATOLI) – Ministru Justisa, Manuel Cárceres da Costa, hatete husu ona jerente otél Timor, Tiago Barrata, atu aprezenta relatóriu selu taxa arrendamentu  ba Estadu durante okupa otél Timor ba atividade negósiu, nune’e governu bele regulariza hodi selu taxa.

Carcéres dehan jerente otél Timor ho Gabinete Ministériu Justisa halo ona soru-mutu  dala rua hodi aprezenta dokumentu kona-ba kontratu ne’ebé governu no kompañia estabelese, maibé dokumentu ne’e seidauk konvense  governu atu foti desizaun, tanba seidauk kompleta ho relatóriu selu taxa arrendamentu durante ne’e.

Iha kontratu inísiu hosi governasaun dahuluk, nia dehan hetan revizaun hosi Governu da-haat fó  aluga to’o loron 20 fulan-maiu 2027.

Agora sira atu aprezenta tan dokumentu sira selu ka lae, se sira selu, selu  to’o sa fulan ne’e para ha’u bele konta fulan selu ne’e to’o fulan abril 2019”, dehan ministru ba jornalista sira iha Palásiu Governu, ohin.

Nia dehan relatóriu pagamentu maka sai evidénsia  atu justifika katak durante ne’e kompañia selu taxa ba Estadu.

“Sira dehan mai ha’u sira selu balun ona maibé ha’u dehan selu balun ne’e lori dokumentu ne’e mai aprezenta hosi data ida ne’e to’o ne’ebá para ba oin ita haree”, tenik tan.

Iha kontratu define ona valór arrendamentu maibé, Governante relata la dekor valór ne’e. Bainhira kompañia submete ona relatóriu ne’e ba governu sei rezolve problema ne’e.

Ministru ne’e dehan durante ninia mandatu sei la fó perdaun ba kompañia nasionál no estranjeiru ne’ebé okupa propriedade no bens e móveis Estadu nian maibé la kumpre devér hodi selu taxa.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here