Delegasaun lider joven polítiku EUA nian hasai foto hamutuk ho embaixadora, Kathleen Fitzpatrick, ho timoroan sira balun, iha kalan ne'e, hafoin resepsaun. Foto Mídia embaixada EUA.

DILI, (TATOLI) – Embaixadora Estadu Naklibur Amérika (EUA-sigla inglés), Kathleen M. Fitzpatrick, hala’o resepsaun benvindu iha loron 10 abril 2019 ba delegadu Amerikanu na’in neen ne’ebé partisipa iha interkámbiu polítika internasionál ida mai iha Timor-Leste organiza husi Konsellu Amerikanu ba Lider Polítika Joven (ACYPL).

 

“Ho sira-nia matenek no esperiénsia barak ne’ebé iha, imi bele haree tansá maka ami kontente simu sira iha Timor-Leste nee”, refere komunikadu Embaixada EUA iha Timor-Leste, iha minutu balun liubá ba redasaun TATOLI.

 

Iha loron 8 to’o 13 Abril delegasaun sei esplora área sira hanesan polítika, governasaun no mekanizmu halo desizaun polítika iha Timor-Leste.

 

Ida-ne’e interkámbiu lideransa polítika ba datoluk hanesan parte husi akordu ida entre ACYPL no Governu Timor-Leste ne’ebé patrosina interkámbiu refere.

 

Liuhusi parseria ida-ne’e, ACYPL haruka nia delegasaun ba dahuluk husi EUA mai Timor-Leste iha marsu tinan 2017 no simu delegasaun Timor-Leste ba iha EUA iha maiu 2018.

 

Ne’e grupu diversu ida ne’ebé inklui feto no mane sira, husi urbanu no rurál; Republikanu sira, Demokrata sira, no Independente sira.

 

Tuir komunikadu ne’e delegadu sira iha interkámbiu ne’e inklui Anne Bailey, Diretór Organizadór South Carolina, nian ba Kampaña Kamala Harris ba Prezidente; Exelénsia Stephanie Meyer, Prezidente Shawnee nian.

 

Konsellu Sidade Kansas; Amol Naik, Ofisiál Xefe Reziliénsia ba Prezidente Kámara Munisipál Atlanta; Bryan Pedersen, Reprezentante ACYPL; Rick Smotkin, Prezidente Konsellu Diretivu ACYPL nian; no Katherine Soares, Vise Prezidente Konsellu Administrasaun iha Konsellu Líderansa Amerikanu-Portugés EUA nian.

 

Delegasaun ne’e sei hasoru malu ho governu nia ofisiál sira no lider emprezariál sira iha Dili no vizita Illa Atauro, fatin ba tasi ne’ebé konsidera ho biodiversidade boot liu iha mundu atu aprende liután kona-ba problema ambiente sira ne’ebé Timor-Leste no rejiaun ne’e hasoru.

 

“Interkámbiu ACYPL fó ba lider emerjente sira perspetiva globál ida”, dehan Xefe Ezekutivu ACYPL, Libby Rosenbaum.

 

“Grupu ida-ne’e sei hetan perspetiva ida ne’ebé úniku kona-ba istória, polítika no kultura Timor-Leste nian, no importante liu, sira sei kria relasaun profisionál no amizade sira ne’ebé bele dura ba moris tomak.”

 

Iha juñu 2018, EUA simu Timor-Leste iha ninia programa dezenvolvimentu lideransa joven iha Sudeste Aziátiku Inisiativa Lider Joven Sudeste Aziátiku (YSEALI).

 

Lider joven timoroan sira liu 700 maka partisipa ona iha YSEALI no barak liután maka selesionadu ona atu partisipa iha semináriu rejionál sira no mós programa bolsa iha EUA.

 

Ida husi membru sira ne’e inklui Apolinario dos Santos, ema ba dahuluk husi Timor-Leste atu partisipa iha YSEALI nia Professional Fellows Program kona-ba Governasaun no Sosiedade iha maiu 2019, ne’ebé sei implementa mós husi ACYPL.

 

Nia sei kompleta bolsa semana-lima iha Columbia, South Carolina no tuirmai partisipa iha Spring 2019 Professional Fellows Congress iha Washington, DC.

 

Harii iha tinan 1966, ACYPL nia misaun mak atu fó ba jerasaun ofisiál eleitu sira no espesialista polítika sira perspetiva globál ida kona-ba maioria kestaun urjente sira ne’ebé akontese iha mundu.

 

Tinan-tinan, ho apoiu husi Departamentu Estadu (Ministériu Negósiu Estranjeiru EUA nia), organizasaun parseiru internasionál sira, no sira seluk tan, ACYPL hala’o interkámbiu oin-oin ba lideransa polítika emerjente sira husi EUA no mundu tomak.

 

Iha rede antigu-alunu liu 8,500 iha nasaun no territóriu hamutuk 128, no barak husi ema hirak ne’e sa’e ona ba iha pozisaun importante sira iha nivel nasionál no internasionál.

 

Jornalista: Rafy Belo

 

Editora: Rita Almeida

HAKEREK NO HATÁN

Please enter your comment!
Please enter your name here