DILI, (TATOLI) – Komisaun D ne’ebé trata asuntu kona-ba ekonomia no dezenvolvimentu Parlamentu Nasionál (PN) halo audiénsia ho Ministru Agrikultura no Peska (MAP), Joaquim José Gusmão dos Reis Martins, relasiona fiskalizasaun ne’ebé halo ba irrigasaun, fini, tratór no problema seluk ne’ebé durante ne’e hasoru.

“Liuliu irrigasaun ezistente ne’ebé iha estragu husi udan boot ne’ebé akontese. Iha 2019 ita la tau orsamentu ba irrigasaun, maibé ita komesa identifika irrigasaun sira ne’ebé maka nia kobre área ne’ebé boot, ba tinan oin ita tau osan halo manutensaun”, Joaquim afirma hafoin audiénsia iha Parlamentu Nasionál, ohin.

Ministru salienta ba irrigasaun ne’e iha tinan rua nia laran la halo liu manutensaun, maibé halo normalizasaun ba bee nian de’it, mas iha tinan ne’e hahú halo intervensaun hanesan iha Karau-Ulun, Oebaba no Samalari.

Kona-ba kestaun fini nian tanba orsamentu iha tinan kotuk prevee de’it atu hola fini tonelada 25 no labele foti hotu fini husi asosiasaun ne’ebé prodús fini, maibé tinan ne’e hasa’e atu sosa fini tonelada 140 ba hare no 120 ba batar.

“Ita espera iha tinan ne’e bele absorve fini ne’ebé maka sira prodús barak liu”

Ministru hatutan problema fini ne’e asosiasaun sira prodús barak, mas orsamentu husi Governu maka nia podér kompra maka lato’o atubele hola hotu fini sira ne’e.

Tanba orsamentu uitoan maka ministru relata orientasaun husi Primeiru-Ministru tinan oin tau prioridade ba iha agrikultura maka’as.

“Ne’ebé ita tenke halo planu ida ne’ebé di’ak para bele atende hotu preokupasaun agora eziste”.

Orsamentu ne’ebé maka aloka ba Ministériu Agrikultura no Peska iha 2019 hamutuk $14,709,250 ne’ebé maka nia ezekusaun iha trimestre dahuluk atinje ona porsentu 24 ne’ebé ezekuta ba programa sira ne’ebé jerál de’it hanesan viajen lokál, peskiza, sosa fini ne’ebé iha hela prosesu konkursu públiku.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here