Prokuradór Jerál Repúblika, José da Costa Ximenes. Imajen Egas Cristovão

DILI, (TATOLI)—Ministériu Públiku (MP) akuza tiha ona suspeitu ba kazu kontentór sia (9) hodi haruka ba Tribunál Distritál Dili (TDD) para deside loron julgamentu.

Prokuradór Jerál Repúblika, José da Costa Ximenes, informa katak, iha loron 30 Marsu, hafoin aprezenta ba iha Tribunál Distritál Dili, iha loron 2 Abril, Tribunál aplika kedas medida kuasaun rua maka Termu Identidade Rezidénsia (TIR) no Proibisaun Auzénsia (tahanan kota) ba arguido timoroan ida.

Nudár Prokuradór Jerál, José da Costa Ximenes, la aseita bainhira Tribunál aplika TIR ba autór,  maibé Prokuradór Jerál a respeita desizaun Tribunál nian.

“Ita iha mekanizmu katak kuandu la konkorda bele halo rekursu. Portantu, desizaun Tribunál iha ninian ponderasaun rasik. Ha’u lakohi maka sidadaun estranjeiru Tribunál fó aprezentasaun periódika ka proibisaun auzénsia. Timoroan ne’e ita sei bele simu”, hateten PJR José Ximenes, ba jornalista sira, ohin, hafoin hasoru malu ho Prezidente Repúblika  iha Palásiu Prezidente Nicolau Lobato, Bairru Pité, Dili.

Nia apela ba públiku katak instituisaun sira liu-liu hanesan Servisu Rejistu no Verifikasaun (SERVE) ne’ebé hasai lisensa atividade ba kompañia sira tenke ho kuidadu tanba iha kontentór 9 ne’e iha sidadaun Timor na’in ida ne’ebé sai akuzadu relasiona ho hatama sasán ne’ebé lei bandu.

“Timoroan ne’e iha lisensa ba atividade hatama matéria sira ne’e hosi rai li’ur, maibé sé ita haruka sasán sira ne’e mai ita-nia fábrika halo ai-moruk ne’e iha ka laiha? Nusa ita importa tiha mai ne’e depois ita esporta fali ba iha Indonézia? Ida ne’e responsabilidade kontrolu iha órgaun sira hotu. Kompañia balun rejista iha SERVE ne’ebá dehan loke restaurante maibé atividade ne’e massage (komu isin) fali. Tanba ne’e tenke kontrola maka’as, se lae, sira aproveita ita-nia ignoránsia hodi halo atividade kriminál”, afirma José Ximenes.

Iha loron 30 Marsu liu-ba, Ministériu Públiku hamutuk ho Polísia Nasionál Timor-Leste kaptura sidadaun Timor na’in ida ho inisiál AP ho matéria báziku droga ho totál kilograma 250 no kokaina grama 160.

Iha biban ne’e, aleinde informa ba Prezidente Repúblika kona-ba kazu importasaun droga, Prokuradór Jerál informa mós situasaun balun kona-ba kazu falsifikasaun dadus veteranu ninian ne’ebé Ministériu Públiku akuza tiha ona ema na’in 9.

Ba prosesu ida ne’e (falsifikasaun dadus),  José Ximenes informa, prejuizu Estadu ho orsamentu  US$193.000, tan ne’e suspeitu sira balun tama ona iha prizaun preventiva no balun iha hela aprezentasaun periódika.

Aleinde ne’e, nia informa mós kazu oho Administradór Postu Administrativu Zumalai, Santiago Barreto iha fulan kotuk. Polísia kaptura ona suspeitu no agora daudaun iha prizaun preventiva no restu polísia sei buka tuir.

Prokuradór jerál hato’o mós kazu oho Xinés ida iha Bairru-Pité, fulan kotuk, iha ne’ebé polísia konsege kaptura ona suspeitu, agora iha prizaun preventiva no mós suspeitu oho joven ida iha Uatulari (Viqueque) iha loron 11 Marsu liu-ba, oras ne’e iha ona prizaun preventiva.

PJR José  Ximenes mós informa kona-ba estatutu foun Ministériu Públiku ne’ebé hahú inisia iha loron 1 Marsu, iha ne’ebé halo ona konsultasaun ho sosiedade sivíl no iha loron 15 Marsu, reúne ho kuadru sira hosi Ministériu Públiku nian hodi husu ideia ka sujestaun.

Nia hatutan, iha 5 Abril, Ministériu Públiku realiza konferénsia internasionál ida ne’ebé tituladu ba Ministériu Públiku Timor-Leste hodi ko’alia kona-ba serbisu pasadu, prezente no futuru no agora daudaun ekipa ne’e lidera hosi Prokuradór Jerál rasik hodi halo revizaun ikus para haruka ba governu.

José Ximenes haklaken, Prokuradór Jerál hamutuk ho sosiedade sivíl mós sei halo movimentu nasionál kona-ba protesaun labarik, liuliu abuzu sexuál ba labarik sira ne’ebé sai preokupasaun públiku.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here