Ministru Justisa, Manuel Cárceres da Costa. Imajen Egas Cristovão

DILI, (TATOLI) – Governu seidauk implementa dekretu lei númeru 46/2011, 19 outubru sobre rejime emolumentu ba rejistu no notariadu, tanba sei prepara kondisaun infraestrutura no sistema atendimentu ida lalais no efisiénsia.

Bainhira instala ona sistema di’ak, governu liuhosi Ministériu Justisa, Diresaun Nasionál Rejistu no Notariadu (DNRN) sei aplika kobransa ba sidadaun ne’ebé trata Billete Identidade no sertidaun RDTL no seluk tan ne’ebé oferese hosi DNRN.

“Atendimentu públiku ne’e maka importante, labele kobra ema nia osan kuandu ema ne’e mai hein”, dehan Ministru Justisa, Manuel Cárceres da Costa, ba TATOLI iha Palásiu Governu, ohin.

Atu implementa dekretu lei ne’e, Cárceres dehan  governu da-ualu presiza kria tan diploma ministeriál hodi legaliza kobransa emolumentu, servisu hothotu ne’ebé governu presta ba ninia ema.

“Ha’u laiha korajen atu kobra ema kuandu ema forma iha estrada laran. Tenke halo uluk fatin dignu, konfortavel, atendimentu públiku ne’ebé lais ne’e ita kobra ema mós sente satisfás”, akresenta.

Nia afirma bainhira desentralizasaun servisu  ministériu nian ba munisipiu la’o di’ak ona,  atendimentu no ekipamentu fó ona satisfasaun ba sidadaun maka governu sei hanoin atu implementa lei refere.

Jornalista: Agapito dos Santos

Editora: Rita Almeida

DNRN Sei Implementa Kobransa ba Produsaun Sertidaun RDTL ho BI

 

 

HAKEREK NO HATÁN

Please enter your comment!
Please enter your name here