Primeiru-Ministru Taur Matan Ruak Akompaña husi Diretór Ezekutivu Ajénsia Tecnologia da Informação e Comunicação (TIC) Timor I.P Roberto Caetano de Sousa Vicente Lansamentu Projetu Fibra Ótika Terrestre,Imajen/Egas Cristovão

DILI, (TATOLI) – Governu da-ualu ohin lansa ona Fibra Ótika terrestre hanesan programa importante no infraestrutura bázika liga ho Governu Eletróniku no Dijitál hodi halo ligasaun ba Instituisaun Estadu sira iha munisípiu 12 la inklui Rejiaun Administrativa Espesiál Oekusi-Ambenu (RAEOA).

Primeiru-Ministru, Taur Matan Ruak, halo teste ba plataforma hodi halo vídeo konferénsia ho autoridade munisípiu sira. Imajen Egas Cristovão

Ajénsia Teknolojia, Informasaun no Komunikasaun, Institutu Públiku (TIC Timor) ne’ebé tutela iha Gabinete Primeiru-Ministru, nu’udar responsavel konsege konklui instalasaun no konfigurasaun durante tinan ida, hahú iha loron implementasaun projetu ne’e iha loron  27 marsu 2018 to’o agora.

Iha biban serimónia lansamentu, Primeiru-Ministru (PM), Taur Matan Ruak, hateten laiha justifikasaun katak Timor-Leste la’o ba kotuk atu la aproveita teknolojia ne’ebé avansa iha mundu.

“Karik ita la implementa sistema ne’e, ita nia servisu neineik, komplikadu buat ida ita bele halo loron ida maibé ita halo ba semana ida”, tenik nia iha ámbitu lansamentu ne’ebé hala’o iha Palásiu Governu.

Hodi hatutan: “Ne’e pasu pozitivu tebes tanba ikus liu bele profesionaliza ita nia administrasaun públika di’ak liu, fó rapidés ba servisu sira no mós ekonomiza ita nia tempu no rekursu”.

Diretór Ezekutivu TIC Timor, Roberto Caetano de Sousa Vicente. Imajen Egas Cristovão

Diretór Ezekutivu TIC Timor, Roberto Caetano de Sousa Vicente, hateten instituisaun ne’ebé nia lidera assume responsabilidade hodi implementa projetu ne’e no dezenvolve infraestrutura bázika husi rede fibra ótika terrestre ne’ebé Governu Timor-Leste rasik mak sai na’in hodi opera no asegura.

“Inisiativa ida ne’e kontribui hodi atinje meta médiu prazu Planu Estratéjiku Dezenvolvimentu Nasionál (PEDN), ligadu ba Governu Eletróniku hodi implementa sistema no mós Programa VIII Governu hodi promove Governu ne’ebé modernu, eletróniku, besik liután, simples, ladún burokrátiku no benefisiáriu sira bele asesu husi plataforma oin-oin ne’ebé disponivel”, tenik tan.

Nia hatutan tan ligasaun doméstika ne’e funsionáriu públiku ne’ebé hanesan benefisiáriu iha munisípiu 12, sei iha asesu direta ba aplikasaun sira ne’ebé dezenvolve hela husi TIC Timor, inklui asesu ba GRP-Free balance, Dalan ba futuru no mós website ministériu no ajénsia ne’ebé dezeñu no rai ona iha sentru dadus Governu Eletróniku iha TIC Timor.

Nune’e mós prepara atu fasilita rede Governu ne’ebé integradu no eskluzivu bainhira iha futuru atu implementa ligasaun internasionál liuhosi dalan fibra ótika submarinu.

“Governu Eletróniku la’ós de’it ko’alia kona-ba hadi’a prosesu atuál uza dalan dijitál, maibé involve oinsá atu hanoin hikas no transforma maneira operasaun ou servisu Instituisaun Governu nian ho sidadaun hanesan sentru husi konseitu ne’e rasik”, tenik.

Hodi hatutan: “Ita bele atinje Governu Eletróniku liuhosi integrasaun vertikál no horizontal husi sistema Governu nia hodi fasilita kruza komunikasaun entre Governu, ajénsia no departamentu sira. Ho nune’e sidadaun no negosiante sira iha asesu ne’ebé fasil ba Instituisaun Estadu sira no evita prosesu manual ho dokumentu formatu papel (surat tahan)”.

Iha mós ministériu balun ne’ebé agora uza ona liña fibra ótika diretamente husi sentru dadus TIC Timor nian hanesan Ministériu Negósiu Estranjeiru no Kooperasaun (MNEK), Ministériu Reforma Lejizlasaun no Asuntu Parlamentár (MRLAP), Ministériu Obra Públika (MOP), Ministériu Saúde (MS), Unidade ba Planeamentu, Monitorizasaun no Avaliasaun (UPMA), Gabinete Primeiru-Ministru, Ministru Estadu ba Koordenadór Asuntu Ekonómiku (MEKAE) no seluk tan.

Projetu ne’e aproveita liña transmisaun Eletrisidade Timor-Leste (EDTL) ho distánsia maizumenus kilómetru 603.

Governu dahituk liuhosi Xefe Governu no operadór telekomunikasaun Timor Telecom (TT) nu’udar manan na’in ba projetu ne’e asina kontratu iha loron 15 novembru 2017 ho naran projetu Fornecimento, e instalação, a configuração, e o comissionamento da rede nacional principal de fibra ótica.

Projetu ne’e seidauk kobre iha RAEOA, tanba bainhira projetu ne’e prepara iha Governu da-neen, RAEOA la tama iha planu  infraestrutura iha governu liu ba, maibé sei tama planu tinan 2020 hodi bele kompleta.

Iha biban serimónia ne’e, Xefe Governu halo teste ba plataforma hodi halo vídeo konferénsia ho autoridade munisípiu sira, nune’e garante katak rede nasionál ne’e la’o ho di’ak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here