Dosente Departamento Politika Publika,Fakuldade Ciencias Sociais,UNTL, Victor Soares, hakerek nain ba Livru “Kura Kanek Hatudu Fitar”. Imajen/Egas Cristovão

DILI, (TATOLI)-Eskritór Vitor Soares hanesan mós dosente Universidade Nasionál Timor Lorosa’e (UNTL), Fakuldade Siénsia Sosiál (FSS), Departamentu Polítika, ohin, iha Kampus UNTL, Caicoli, Dili, lansa tan ho impresaun ba da-haat ho títulu Kura Kanek, Hatudu Fitar”.

 “Kura kanek, Hatudu Fitar, nu’udar ilustrasaun ida atu fasil komprende”, hateten Eskritór Vitor Soares ba Ajénsia TATOLI hodi esplika liu tan, iha livru ne’e, restaurasaun independénsia loron 20 Maiu 2002 iha Tasi Tolu hanesan ai-moruk boot no ai-moruk ida ne’ebé di’ak liu hodi ‘Kura Timoroan Sira-nia Kanek Tuan No Kanek Foun’, sira ne’ebé akontese iha Timor-Leste hahú husu 1911-19 13 iha Manufahi; 1959 iha Viqueque no kanek ne’ebé akontese iha tinan 1974-1999.

“Hatudu fitar ne’e kanek ne’ebé hetan kura, husi kanek na’in rasik ou liuhusi ema seluk nia ajuda sempre iha nia kanek fatin alias Fitar”, Vitor hateten.

Livru Kura Kanek, Hatudu Fitar kompostu husi kapítulu I-X. Tópiku sira ne’e, publika ona iha mídia imprensa lokál sira. Konteúdu husi livru ne’e hakerek na’in foka liubá sofrimentu sira ne’ebé povu Timor-Leste enfrenta husi 1974-1999 ne’ebé ikus mai hatudu duni nia rezultadu “Ukun Rasik Aan” hanesan Kanek ne’ebé Fitar ona.

Livru ne’e kompostu husi pájina 114 nu’udar edisaun dahuluk no imprime husi Silvia Dili. Hakerek Na’in Vitor Soares kompromete katak sei hakerek tan livru seluk tuir mai relevante haree ba dinámika polítika rai-laran nian ho tópiku; Kura Fitar, Hatudu Moris Di’ak.

“Iha 2020 ba leten ,ha’u sei hasai tan livru ida Kura Fitar, Hatudu Moris Di’ak, sentidu katak nesesidade bázika ba povu Timor-Leste, eletrisidade, bee moos no estrada, suku hotu asesu. Entaun kura ona fitar, hatudu ona moris di’ak”, hateten Vitor Soares.

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here