Prezidente Autoridade RAEOA, Mari Alkatiri. Imajen/Dok.eis GPM

OE-CUSSE,(TATOLI) – Tuir planu no orientasaun servisu Autoridade Rejiaun Administrativu Espesiál Oe-Cusse Ambeno (RAEOA) nian, iha tinan ne’e, sei alastra dezenvolvimentu ba sub-rejiaun tolu hodi sai sidade.

“Iha tinan ne’e, atu hahú tan dezenvolvimentu ba sub-rejiaun tolu ne’ebé atu sai sidade, hanesan Sub-Rejiaun Oesilu, Pásabe no Bouknana”,  hateten Prezidente Autoridade RAEOA, Mari Bin Amude Alkatiri, horiseik, iha Oe-Cusse.

Mari Alkatiri esplika katak, maske diverjénsia polítika  iha, maibé la impede nia atu servisu nafatin tanba dezenvolvimentu Oe-Cusse ba interese nasionál. Katak,  la’ós partidu ida nian maibé ema hotu nian, tanba ne’e Alkatiri hatutan, tenke iha entendimentu ida.

“Interese partidu labele iha interese nasionál nia leten, la iha ema ida maka iha Estadu nia leten, ita tenke respeita, la’ós tau ema ida nia vontade iha leten hotu. Tanba ne’e, ha’u hakarak husik ezemplu di’ak ba ema hotu, ha’u hakarak husik buat di’ak ba jerasaun ohin no sei mai katak dalan atu halo polítika maka oinsá no jerasaun foun sira tenke hanoin naruk no hateke ba oin”, hateten Mari Alkatiri.

Nia afirma mós katak, dezenvolvimentu Oe-Cusse sai hanesan laboratóriu ida iha futuru ka sai hanesan ezemplu ba munisípiu sira seluk. Tanba ne’e, tuir Mari Alkatiri, ema ne’ebé maka atu enfrakese kapasidade dezenvolvimentu RAEOA nian nia lakohi rona.

“Ha’u la preokupa mandatu tanba ha’u la’ós atu mai buka servisu iha Oe-Cusse no ha’u la’ós mai buka servisu atu hetan osan”, afirma Mari Alkatiri, atuál Sekretáriu Jerál partidu FRETILIN.

Nia lia tun tan dehan, “ha’u la preokupa ho mandatu, se ema seluk halo di’ak liu ha’u, ha’u bele ba fali Munisípiu Viqueque ho Lautem atu ema komprende di’ak liu ha’u”.

Nia hatutan, dezenvolvimentu iha rejiaun Oe-Cusse foin maka tinan tolu de’it. Signifika, setór barak maka seidauk atinje, maibé edukasaun investe daudauk ona, saúde mós hanesan, eletrisidade, irrigasaun no seluk tan.

“Foin maka 2019, ita husu fali saida maka seidauk atinje, sei ita maka husu atinje ona saida, ida ne’e ha’u bele hatán eletrisidade ba povu tomak, uluk iha Pante Makasar bee mós fornese ba ema uitoan de’it, maibé ba ema barak ona”, Mari Alkatiri hateten.

 Jornalista : Zezito Silva

Editór: Francisco Simões

2 KOMENTÁRIU

  1. Sim, klarumente Maibe tenke controls maksimu aliadu sira nebe hakrak estraga ba dotor Mari alkatri nia obra nebe agora halo Desemvolvimentu ba povu oecusse, apoio 100% avansa nafatin.

HAKEREK NO HATÁN

Please enter your comment!
Please enter your name here