Prezidente Autoridade RAEOA, Mari Alkatiri, ohin, kuda ai-oan iha Oe-Cusse. Imajen/ZEESMTL

OE-CUSSE, (TATOLI)– Iha ámbitu tinan 2019 to’o 2023, Autoridade Rejiaun Administrativu Espesiál Oe-Cusse Ambeno (RAEOA) sei kuda ai-oan hamutuk millaun hitu (7) atu bele haburas no hamatak liu tan  ambiente iha rai enklave husi Timor-Leste ne’e.

Atu atinje meta polítika reflorestasaun iha rejiaun ne’ebé lidera husi Mari Alkatiri ne’e, ohin, iha Oe-Cusse, Sekretáriu Rejionál asuntu Agrikultura no Dezenvolvimentu Rurál (SRAADR), Regio da Cruz, hahú ona kuda ai-oan hamutuk huun 400 husi ai-oan millaun hitu ne’ebé iha.

Regio da Cruz,  hateten, programa ida ne’e hanesan kampaña kuda ai-oan ne’ebé importante atu promove polítika kona-ba konservasaun no protesaun ba rai agrikultura no ambiente.

Liuhusi programa ne’e, Regio da Cruz hatutan, kontribui ba vizaun autoridade Zona Ekonómiku Espesiál Sosiál Merkadu (ZEESM) kona-ba harii Oe-Cusse Ambeno nu’udar territóriu ne’ebé matak iha Timor-Leste.

“Ida ne’e atu kontribui no promove hamutuk husi deklarasaun Prezidente Repúblika kona-ba sidadaun ida, ai-hun ida”, afirma  Regio da Cruz, iha nia intervensaun ba kampaña kuda ai-oan ne’e.

Nia husu ba autoridade sira iha rejiaun Oe-Cusse katak hahú husi ohin ba oin komesa ko’alia barak kona-ba ai-horis, kuda ai-fuan, kuda ai ba ekonomia povu Oe-Cusse ba tinan 15 oin mai. Tanba ne’e, Oe-Cusse iha sentru viveiru sentrál iha haat no sub-sentru viveiru sentrál iha suku 18 no liga ho governu sei kontinua nia kompromisu atu prepara ai-oan no sei distribui ba uma kain hothotu, ba grupu benefisiáriu hotu ne’ebé hakarak, tanba ne’e tenke kuda ai-fuan, tenke kuda ai ba ai-laran no tenke kuda ai ba wee matan.

Husi ai-oan millaun hitu maka ai ne’ebé sei distribui no kuda, iha porsentu 40 ai-fuan no ai ne’ebé iha valór agro komérsiu iha porsentu 30 ne’e hanesan planta industriál, ezemplu ai mahoni no seluk tan inklui porsentu 20 kona-ba ai kaizus.

Jornalista : Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here