Ministru Negósius Estranjeirus no Kooperasaun, Dionísio da Costa Babo Soares. Imajen/Antonio Gonçalves

DILI,(TATOLI)-Ministru Negósiu Estranjeiru no Kooperasaun (MNEK), Dionísio Babo Soares, ohin, aprezenta ona lista naran embaixadór foun na’in 10-resin ba Primeiru Ministru (PM), Taur Matan Ruak, hodi substitui embaixadór sira ne’ebé maioria remata ona sira nia mandatu durante tinan hirak kotuk.

“Ha’u hato’o tiha ona ba Primeiru Ministru depois aprova ona maka sei hato’o ba Prezidente Repúblika para fó ninia aprovasaun ikus, tanba pruvolta embaixadór sanulu resin maka remata ona sira nia mandatu kleur ona”, hateten Ministru Dionísio Babo Soares, ba Jornalista sira iha Palásiu Governu, Dili.

Husi lista ne’e,  na’in haat hetan  ona aseitasaun husi nasaun sira iha li’ur komesa kedas mandatu governasaun da-hitu  atu prienxe servisu estadu iha diaspora.

Diplomata timoroan sanulu resin ne’e sei koloka sira nia misaun diplomate iha nasaun sira hanesan Singapura, Australia, Mozambique, Vatikanu, Jenebra, Inglaterra, iha Washington Amérika no nasaun seluk-seluk tan.

Dionísio Babo konfirma katak, husi naran hirak ne’e, balun ho karreira diplomata no balun konfiansa polítika hosi governu da-ualu. Maske nune’e, tuir lei primeiru ema tenke iha esperiénsia, prestasaun servisu barak kona-ba nasaun, koñese di’ak polítika no objetivu  estadu no governu atu bele reprezenta estadu iha nivel polítika externa, leyalidade ho kritéria seluk ne’ebé sei hetan konkordánsia husi Primeiru Ministru.

 “Ita foin agora maka prepara hela klasifikasaun ba embaixada sira iha ita nia nasaun husi klase 1, klase 2 no 3  entaun nia mandatu durasaun atu hela iha embaixada sira ne’e la hanesan”, hateten Dionísio Babo.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here