Embaixadór Indonézia iha Timor-Leste, Sahat Sitorus. Imajen/ZEESMTL

OE-CUSSE,(TATOLI)– Ohin, Oe-Cusse sai matak tanba lideransa di’ak hanesan Prezidente Autoridade Zona Ekonomia Espesiál Sosiál Merkadu Timor-Leste (ZEESMTL), Mari Akatiri, maske uluk Indonézia sei ukun TL konsidera área ne’e hanesan rai maran no governu Indonézia husik de’it.

“Uluk Indonézia, konsidera área ne’e hanesan rai maran, governu Indonézia husik leet de’it, la iha ema Indonézia ida maka atu sai governadór ba Nusa Tengara Timur, depois sira dehan de’it maromak mak sei ajuda sira, ohin loron akontese, rai hahú matak tanba lideransa Mari Alkatiri”, louva Embaixadór Indonézia iha Timor-Leste, Sahat Sitorus, nia intervensaun iha ámbitu kuda ai-oan iha Oe-Cusse, ohin.

Embaixadór hateten, “ha’u reprezenta Governu Indonézia fó obrigadu ba konvite ne’ebé ha’u hetan hosi ZEEMS no ha’u nia prezensa no partisipasaun ba kuda ai-oan, ha’u sei relata ba Prezidente Repúblika Indonézia Joko Widodo”. Tanba ne’e, Timor-Leste haree Indonézia hanesan amigu nafatin, hamutuk hodi hamatak nasaun rua ne’e sai buras liután.

Tuir Embaixadór, Timor-Leste maske nia lideransa sira iha diverjénsia polítika maibé objetivu ida de’it maka dezenvolvimentu nasaun nian.

“Ha’u empresta liafuan hosi lideransa Timor-Leste nian katak hamutuk ita bele, hamutuk ita forte no hamutuk ita proteje meiu ambiente” subliña. Nune’e maka hanesan lideransa maun boot Xanana Gusmão, Mari  Akatiri, Taur Matan Ruak, Lu-Olo no sira seluk tan bele hamutuk hodi halo rai ne’e matak no buras liután tanba maromak oferese rai ne’e atu ita kuidadu no hadi’a no ita mai hosi rai no moris hosi rai ne’e nia bokur”, hateten Sitorus.

Jornalista: Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here