Entidade oinoin iha RAEOA kuda ai-oan. Imajen hosi FB ZEESM TL

OEKUSI, (TATOLI) – Sekretáriu Estadu ba Ambiente, Demétrio de Amaral de Carvalho, hatete kuda ai-oan bele sai mós laboratóriu ba melloramentu ekolojia iha Timor-Leste (TL).

Sekretáriu Estadu ba Ambiente, Demétrio de Amaral de Carvalho, iha ámbitu kampaña sidadaun ida ho ai-oan ida ne’ebé hala’o iha Oekuse, ohin. Imajen hosi FB ZEESM TL

“Ita hili fatin ida ne’e hodi kuda ai-oan ho milliaun hitu, ida ne’e rekór boot tebes, kuandu ita kuda hotu signifika ita hatudu espíritu hadomi ambiente, atu ba oin bele rezulta ekolojia karbonu ne’ebé neutrál”, dehan nia iha ámbitu kampaña sidadaun ida ho ai-oan ida iha Rejiaun Administrativa Espesiál Oekusi-Ambenu (RAEOA), ohin.

Nia dehan bainhira hili espésie ai ne’ebé loos atu kuda ba bee matan sira, kuda iha tasi ibun sira no atu distribui ba komunidade atu kuda, tan ho valór no nia funsaun ne’ebé la hanesan.

Demétrio Amaral hatutan Oekusi hanesan rejiaun ida ne’ebé iha tinan balun ba oin bele deklara rejiaun karbonu neutrál.

Ida ne’e, nia katak poluisaun ki’ik oan hasai iha Oekusi no sentidu ekolojia nian bele rekupera fila fali hodi sai karbonu neutrál.

Nia fó parabéns ba autoridade RAEOA ne’ebé halo esforsu hodi hatutan kampaña nasionál Prezidente Repúblika, Francisco Guterres Lú Olo, katak sidadaun ida, ai-hun ida, tanba ne’e asaun ida ne’e fó mosaun boot liután ho kampaña ida ne’e hodi kuda ai milliaun hitu.

Tanba ne’e ai-horis iha valór barak, kuda ai-kameli nia valór ekonómiku boot tebes tanba iha merkadu internasionál ho presu kilograma ida $80.

Tuir nia Oekusi ne’ebé furak tenke iha bee moos, tenke iha rai ne’ebé buras atu fornese ai-han ba ita no ita nia responsabilidade maka tenke mantein kualidade ambiente ne’ebé di’ak.

Iha fatin hanesan Prezidente Autoridade RAEOA, Marí Alkatiri, hateten ita ema moris dala barak ita mak oho an tanba la trata natureza ho di’ak, ita tesi ai, bee maran, bainhira bee maran ita hamrook, rai mós la produtivu no rezulta hamlaha no hamrook.

Prezidente Autoridade husu atu povu akompaña programa kampaña ida ne’e, tanba ida ne’e hanesan parte iha planu estratéjiku dezenvolvimentu rejionál, protesaun ambiente no dezenvolvimentu integradu no transversal.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here