Entidade oinoin iha RAEOA kuda ai-oan. Imajen hosi FB ZEESM TL

OEKUSI, (TATOLI) – Estadu Timor-Leste kompromete proteje natureza liuhosi lei, polítika, planu nasionál espesífiku atu tane biodiversidade hodi kombate degradasaun no alterasaun klimátika.

Grigorio de Sousa bainhira lee mensajen Prezidente Repúblika kona-ba kompromisu Estadu hodi proteje natureza iha ámbitu kampaña sidadaun ida ho ai-oan ida ne’ebé hala’o iha Oekuse, ohin. Imajen hosi FB ZEESM TL

“Kampaña kuda ai-oan iha RAEOA (Rejiaun Administrativa Espesiál Oekusi-Ambenu) kompleta no hatutan kampaña prezidensiál, katak sidadaun ida ai oan ida, atu bele rezulta esforsu hosi hotu nian hodi hamatak ita nia rai doben ida ne’e”, mensajen Prezidente Repúblika, Francisco Guterres Lú Olo, ne’ebé lee hosi nia reprezentante, Grigorio de Sousa iha Oekuse, ohin.

Nia husu ba responsavel RAEOA no populasaun atu banati kompromisu Estadu nian hodi konserva no kuida meiu ambiente, liuhosi kuda ai-oan.

Nia kongratula povu Oekusi tanba brani hodi kuda ai-oan milliaun hitu iha tinan lima nia laran. Katak, hamutuk sei halo rai matak, malirin, furak ba ita hotu no ba oan no bei oan sira iha tempu tuir mai.

Enkuantu, kampaña kuda ai-oan hanaran sidadaun ida ai-hun ida husu sidadaun ida-idak iha territóriu laran tomak atu kaer metin kompromisu kuda ai-oan ho haree oinsá maka atu tau matan ba ai-oan to’o nia abut kaer metin rai no nia sanak moris ba beibeik.

Entretantu, liuhosi kampaña ne’e bele eduka daudauk ita nia ema sira atu haburas no hametin domin ho responsabilidade hosi sidadaun ida-idak. Hamatak ita nia rai atu garante ambiente ne’ebé furak no saudavel ba jerasaun ohin loron no jerasaun tuir mai.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here