Membru Parlamentu Nasionál Hosi Bankada KHUNTO, António Verdiál.

DILI, (TATOLI) – Bankada Kmanek Haburas Unidade Nasionál Timor Oan (KHUNTO) liuhosi ninia deputadu António Verdial, husu ba governu atu investe iha área edukasaun, liuliu infraestrutura bázika.

“Realidade agora eskola barak mak aat no kondisaun la saudavel. Ezemplu mak kalén eskola barak mak aat ona, kakuluk aat, janela laiha no balun odamatan mós laiha, falta bee mós, aula, kadeira, sintina, falta lutu hale’u resintu eskola halo animal sira mós hola parte iha área eskola ninian”, katak nia liuhosi deklarasaun polítika iha plenária, tersa, (9/4).

Tanba ne’e nia konsidera presiza iha atendimentu ba malu, nune’e hamutuk bele rezolve situasaun hirak ne’e hodi bele hamosu kondisaun ne’ebé saudavel.

Deputadu Partidu Demokrátiku, Adriano do Nascimento. Imajen António Goncalves

Deputadu Bankada Partidu Demokrátiku (PD), Adriano do Nascimento, konsidera deklarasaun Bankada KHUNTO razoavel maibé preokupasaun agora mai husi Parlamentu Nasionál (PN) ne’ebé halo debate no aprova proposta orsamentu husi Governu.

“Uluk se la sala ami halo proposta lubun ida atu hasa’e osan barak liu ba edukasaun, saúde, bee moos, saneamentu maibé ita boot sira lakohi”, katak.

“Problema nia hun sei ita deputadu la aprova osan, ministru sira labele halo milagre, satán sira hasai osan seluk ba halo eskola, ne’e la loos”, dehan.

Tuir Deputadu ne’e edukasaun hanesan baze ba nasaun ida, tanba se ema iha kapasidade di’ak mak nasaun ne’e bele la’o ho di’ak.

“Ha’u husu ba Governu liu-liu bankada AMP (Aliansa Mudansa ba Progresu), ita konsensu atu tau osan ba edukasaun porsentu 30, para ita bele responde problema sira ne’ebé Bankada KHUNTO foti, tanba ne’e realidade”, akresenta.

Hatán ba kestaun ne’e Ministru Reforma Lejizlativa no Asuntu Parlamentár, Fidelis Leite Magalhães, hateten investimentu iha edukasaun iha dezafiu institusionál, maibé Governu la falta kompromisu atu investe.

“Ita tenke hadi’a sistema atu bainhira ita aloka osan tau sistema, la desperdísiu de’it”, katak tan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here