DILI,(TATOLI)-Prezidente Câmara Comércio e Indústria (CCI) Munisipiu Ermera, Luis Alves Tilman, preokupa ho prezensa negosiante Xinés ne’ebé livremente halo sira nia atividade negósiu tama to’o ona postu administrativu.
Iha diskusaun ho Ministru Prezidénsia Konsellu Ministru, Hermenegildo Augusto Cabral Pereira, ohin, iha Palásiu Governu, ekipa CCI ne’ebé lidera husi Luis Alves Tilman, aprezenta sira nia progresu servisu no dezafiu balun ne’ebé mak setór privadu munisipiu Ermera sira enfrenta nudár obstákulu atu kontribui ba dezenvolvimentu nasaun.
“Ami hasoru difikuldade maka liuliu sira ne’ebé iha postu administrativu, liuliu ba lisensa negósiu no prezensa Xinés ba ona iha ami nia munisípiu”, hateten Luis Tilman.
Difikuldade seluk fali, tuir Luis Tilman, burokrasia iha Governu atu fasilita hasai lisensa negósiu ho mós mínimu rekursu umanus no rekursu finanseiru atu bele fortifika lala’ok servisu organizasaun nian.
“Bainhira negosiante Xinés sira tama to’o suku hodi loke mós negósiu ki’ik hanesan ita nia komunidade sira, sei fó ameasa boot ba ekonomia negosiante ki’ik Timoroan sira nian”, hateten Luis Tilman.
Setór privadu hosi eskalaun ki’ik to’o emprezáriu ne’ebé rejista iha CCI Ermera hamutuk 1.495 ne’ebé hala’o atividade negósiu loke loja, konstrusaun sivíl, indústria, kooperativa no seluk tan.
Jornalista: Agapito dos Santos
Editór: Francisco Simões
