Loggo ACYPL.

DILI, (TATOLI) – Konsellu Amerikanu ba Lider Polítiku Joven nian (ACYPL-sigla inglés) hosi Estadu Naklibur Amérika (USA-sigla inglés), ohin hasoru Primeiru-Ministru no Ministru Estadu ba Prezidénsia Konsellu Ministru hodi ko’alia kona-ba dezenvolvimentu Nasaun no suporta ba foin sa’e sira hodi hola parte iha prosesu konstrusaun Nasaun.

“Ha’u hamutuk ho kolega na’in lima mai hosi Amérika liuhosi programa ida ACYPL (American Council Of Young Political Leaders) ohin hasoru malu ho Primeiru-Ministru, Taur  Matan Ruak, no Ministru Agio Pereira hodi ko’alia asuntu importante atu dezenvolve Timor-Leste no depois atu suporta mós jerasaun foun hodi partisipa di’ak liután ba dezenvolvimentu”, dehan Xefe Ofisiál ba Reziliénsia (Chief Resilience Officer) ACYPL, Amol S. Naik, ba jornalista sira hafoin sorumutuk iha Palásiu Governu.

Nia dehan rezultadu diskusaun sei relata ba ninia  organizasaun  bainhira fila ba Amérika hodi foti asaun konkreta, hodi apoiu Timor-Leste.

“Depois ida ne’e ami fila ba Amérika sei lori fila saida maka aprende ona iha ne’e ba nasaun, nune’e bele hakbesik aan liután atu suporta ita nia juventude”, tenik nia liuhosi ninia tradutór timoroan.

Amol dehan tan sira nia ekipa onradu ba povu TL tanba trata sira ho laran luak no di’ak bainhira destina iha Dili (horisehik).

ACYPL mak nu’udar organizasaun la buka lukru, hetan rekoñesimentu hanesan katalizadór eminente pre-introdús aumenta polítiku no profisionál nian ba asuntu internasionál no ba ema seluk.

Ho ninia misaun maka atu promove komprensaun respeitu i amizade no haburas dura tempu naruk relasaun entre lider jerasaun tuir mai iha Amérika no mundu tomak.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here