Sekretáriu Rejionál Edukasaun, Sosiál no Saúde, Arsenio Bano. Imajen hosi FB Arsenio Bano

OEKUSI, (TATOLI) – Sekretáriu Rejionál Edukasaun, Sosiál no Saúde, Arsénio Bano, husu ba profesór sira iha Rejiaun Administrativa Espesiál Oekusi-Ambenu (RAEOA) atu prenxe lista prezensa hafoin bele simu saláriu.

“Autoridade tenke haree hotu lista prezensa, ema labele tama servisu iha semana ida halo de’it oras 26 maibé tenke halo servisu ho oras 40 iha semana ida nia laran”, afirma Bano ba jornalista sira, ohin hodi esklarese preokupasaun profesór 800 ne’ebé manifesta sira nian direitu saláriu fulan-marsu nian.

Arsenio Bano rekoñese profesór sira seidauk simu saláriu iha marsu ne’e nia laran maibé husu ba profesór sira atu prenxe lista prezensa ne’ebé maka iha hafoin sira bele simu osan.

Bano afirma autoridade nia pozisaun klaru, ida ne’e kestaun regra, sé maka la servisu to’o oras 40 iha kada semana sei la simu saláriu.

Nia akresenta profesór sira labele tama hanorin hotu depois fila, maibé tenke tama hanorin, hahú hosi dadeer to’o loro-kraik tuku 17:00. Ida ne’e atu prenxe oras 40 iha kada semana.

Nia husu ba profesór sira atu ba oin tama hanorin hanesan funsionáriu loloos, tama servisu iha tuku 8:00 no sai tuku 17:00. Maske sira bele hanorin iha oras rua nia laran de’it maibé labele fila ba uma, ho intensaun katak profesór sira mós tenke prepara aan didi’ak hafoin bele hanorin estudante sira.

Osan ba retroativu no sira seluk, Bano hateten dokumentu tenke kompletu hafoin bele prosesa sira nia saláriu, se lae labele.

Enkuantu, profesór sira dehan greve depois la hanorin, ida ne’e problema ketak, la tama servisu konsidera falta, la tama durante loron 21 nia laran tenke husu ba Komisaun Funsaun Públika atu termina nia kontratu.

Nia realsa sé maka kumpre regra sei selu tuir nia dezempeñu, no sé maka la hanorin durante oras 40 nia laran konsidera falta.

Bano dehan tan prosesu aprendizajen sei la’o nafatin, la paradu, ema indixiplinadu sira hakarak sai, ema barak maka hakarak tama servisu.

Jornalista: Zezito Silva

Editora: Rita Almeida

Profesór 800 Iha RAEOA Manifesta Direitu Ba Saláriu Fulan-Marsu

1 KOMENTÁRIU

HAKEREK NO HATÁN

Please enter your comment!
Please enter your name here