Mapa eskola iha RAEOA. Imajen hosi portál zeesm.tl.

OEKUSI, (TATOLI) – Profesór hamutuk 800 iha Rejiaun Administrativa Espesiál Oekusi-Ambenu (RAEOA) halo manifestasaun hasoru Sekretáriu Rejionál Edukasaun no Solidariedade Sosiál, Arsénio Bano, tanba seidauk simu saláriu fulan-marsu inklui retroativa.

Profesór sira ne’e hosi ensinu báziku, ensinu rekorrente, ensinu tékniku vokasionál inklui ensinu sekundáriu hamutuk 800 resin halo manifestasaun hasoru Sekretáriu Rejionál Edukasaun no Solidariedade Sosiál, Arsenio Bano, tanba iha fulan-marsu profesór sira permanente no kontratadu seidauk simu saláriu, nune’e mós profesór sira ne’ebé ho lisensa maternidade inklui retroativa.

Portavós, Vicencio Cono iha nia entrevista ba jornalista sira hateten profesór sira iha Oekusi hamutuk 800 resin. Profesór permanente hamutuk 526 inklui kontratadu sira.

“Ami halo manifestasaun ne’e bazeia ba lista prezensa koletivu ne’ebé ami asina ona no hatama iha marsu, maibé osan la tama no derrepente de’it sirkulár ida sai iha 3 marsu ba eskola sira hodi obriga mestre sira atu asina fila fali lista prezensa ho nia personalidade”, dehan portavós.

Cono akresenta retroativa ba pagamentu avaliasaun dezempeña hahú iha 2011 to’o agora seidauk halo pagamentu.

Iha fatin hanesan, Diretór Rejionál Edukasaun Oekusi, Daniel Mauno, salienta manifestante sira manifesta sira nia direitu tanba iha fulan marsu sira seidauk simu saláriu, osan retroativu no seluk tan.

“Ha’u esplika ona ba sira katak diresaun edukasaun rejionál nia servisu maka prosedimentu administrativu, hafoin hatutan ba rekursu umanu no finansa iha Sekretáriu Rejionál Edukasaun no Solidariedade Sosiál hafoin bele submete ba finansa RAEOA hodi prosesa osan ba banku atu profesór sira bele simu”, katak nia.

Maibé diresaun edukasaun nia prezensa atu simu lista prezensa, simu sira nia proposta no direitu balun ne’ebé sira hato’o no ita ba hatutan, katak tan.

Jornalista: Zezito Silva

Editora: Rita Almeida

Profesór Sira Tenke Servisu Oras 40 Kada Semana

 

HAKEREK NO HATÁN

Please enter your comment!
Please enter your name here