Xefe Kaza Sivíl Prezidénsia Repúblika, Francisco Maria de Vasconcelos. Imajen/espesiál

DILI, (TATOLI)–Prezidente Repúblika (PR), Francisco Guterres Lú Olo, nomea Xefe Kaza Sivíl Prezidénsia Repúblika, Francisco Maria de Vasconcelos, hodi  reprezenta Prezidente Repúblika, partisipa iha reuniaun altu nivel,  Asembleia Jerál Nasaun Unidas (ONU-sigla Portugés).

Eventu altu nivel ba dala 73 ne’ebé hala’o iha sidade Nova Iorke, Estadus Unidus Amérika, iha loron 10 fulan Abril ne’e, hodi komemora sentenáriu estabelesimentu Organizasaun Traballu Internasionál (ILO-sigla Inglés).

Reuniaun altu nivel ne’e sei partisipa husi Xefe Estadu no xefe governu nasaun  oioin  hodi hato’o mensajen nasaun nian no Prezidente Repúblika Timor-Leste mós iha oportunidade atu hato’o mensajen nasaun nian.

ILO maka ajénsia multilaterál Nasaun Unidas nian ida ne’ebé espesializada iha kestaun sira relasiona ho traballu. Timor-Leste sai estadu membru ILO nian ba 177 iha loron 19 Agostu 2003. Organizasaun Traballu Internasionál, tulun Timor-Leste hasoru obstákulu sira iha redusaun ki’ak no kria kampu serbisu ba nia populasaun sira.

ILO espesializa nia tulun ba Timor-Leste iha área prioridade tolu maka hanesan promosaun empregu ba joven sira, dezenvolvimentu ekonomia rurál no mós governansa merkadu traballu.

Reprezentante Prezidente Repúblika ho delegasaun Timor-Leste nian dezloka ona ba Nova Iorke,  Domingu (7/4/2019), ne’ebé sei kontinua vizita traballu ba iha Singapura husi loron 12 to’o 15 Abril 2019. Enviadu espesiál Prezidente Repúblika nian ho ekipa delegasaun sei to’o hikas iha Timor-Leste iha loron 16 Abril 2019.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here